L’estèla en onor del poèta marselhés d’expression occitana Victor Gelú, la tirèron en 2012, per fin de permetre a l’arquitècte Normann Foster de renovelar lo Pòrt Vielh de la Ciutat Focèa. Pasmens, tot fa pensar que la tornaràn pas metre.

Segon çò que denóncia Aquò d’Aquí, l’estèla del poèta marselhés, que se trobava davant lo Club Pernod, al Pòrt Viélh de Marselha, fa pas partida del projècte de renovelament que mena a tèrme l’arquitècte Normann Foster. An profechat de l’annada “Marselha capitala europèa de la cultura” per tirar lo monument del grand poèta e polemista marselhés del sègle XIX.
 
De fach, Gelú aviá un bèl monument dreiçat en 1891, que foguèt remplaçat per aquela estèla a l’epòca de la Segonda Guèrra Mondiala.
 
“La reïnstallacion de l’estèla es en cors d’estudi per la Vila de Marselha”, çò a dich a Aquò d’Aquí lo Servici de Premsa de la Comuna, “en partenariat amb l’arquitècte Normann Foster.”
 
Aquò d’Aquí planh aquela enigmatica informacion de las autoritats, que daissa imaginar un sòrt pas gaire optimista per l’estèla de Victor Gelú... E mai se l’arquitècte britanic, quand foguèt causit en 2010 per “reïnventar lo Pòrt Vièlh”, anoncièt que son projècte de renovelament del pòrt consistissiá a lo “rendre als marselheses”.