Actualitats
Serà obligatòri de far la classa en espanhòl, dins las escòlas de Catalonha e Aran, s’un sol escolan o demanda
Un nòu atac contra l’immersion de l’escòla catalana, que de rebuc damatja lo modèl aranés en occitan
Lo Tribunal Superior de Justícia de Catalonha (TSJC) a resolgut que la Conselhariá de l’Ensenhament de la Generalitat de Catalonha deu introdusir l’espanhòl dins totas las salas d’un escolan, se la familha a demandat per via judiciària que l’escolan estúdie en espanhòl. Segon la resolucion, “se deu adaptar tota la classa —o unitat escolara— a aquel escolan”, çò qu’afècta totes los aprenents, e non solament aquel escolan castelhanofòn que sos parents vòlon que siá monolingüe.
Lo tribunal establís que n’i a pas pro amb l’atencion individualizada qu’ofrís la Generalitat. Ça que la, manten qu’es la Generalitat que determina la proporcion e l’equilibri entre las doas lengas.
Tant lo Tribunal Constitucional, amb sa senténcia contra l’Estatut d’autonomia de Catalonha, coma posteriorament la Cort Suprèma, an emés de senténcias que considèran que l’espanhòl deu èsser tanben lenga veïculara dins l’ensenhament en Catalonha e Aran. Lo TSJC se prononcièt en favor del sistèma d’immersion lingüistica mas, a l’encòp, ordenava que se recebèsse las demandas d’aquelas familhas que volián l’escolarizacion en espanhòl.
Per complir las decisions judiciàrias, la Conselhariá de l’Ensenhament del govèrn catalan a balhat a aqueles escolans una atencion individualizada. Mas ara lo TSJC a dich que s’una familha o demanda, l’ensenhament en espanhòl se deu aplicar a totes los escolans amassa e non de manièra individualizada.
Dètz e sèt familhas
Fins ara, tant lo TSJC coma la Cort Suprèma avián ratificat una posicion comuna: s’una familha demandava que son enfant foguèsse escolarizat en espanhòl, l’enfant deviá aver una atencion individualizada mas aquò afectava pas lo foncionament de tot lo sistèma, basat dempuèi mai de trenta ans sus l’immersion lingüistica en catalan, e en occitan en Aran.
La setmana passada, la conselhièra de l’Ensenhament de Catalonha, Irene Rigau, raportèt qu’ongan (cors 2012-2013), sonque dètz e sèt familhas an sollicitat que l’espanhòl foguèsse la lenga veïculara de lors enfants. Aquela donada contrasta amb las sollicituds del cors precedent, 2011-2012, que 106 familhas o demandèron.
La Generalitat non obesirà
Irene Rigau, conselhièra de l’Educacion, a respondut d’una faiçon neta e clara. “La lenga del grop pòt pas cambiar perque un enfant o demande”, çò diguèt. “Planhèm d’aver de defendre de longa lo nòstre modèl, mas quitarem pas jamai d’o far. E contemplam pas la possibilitat d’executar aquela resolucion dins aqueles tèrmes”.
Rigau se mostrèt convencuda que “ganharem aquesta question” quora se poirà recórrer e explicar las rasons de la mantenença del sistèma educatiu catalan que marcha plan dempuèi 30 ans.
Protèsta sus Twitter
Qualques minutas après conéisser la nòva, se fasiá de rambalh sus Twitter, e l’hashtag
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
De qui depent aqueth Tribunal Superior de Justícia de Catalonha, deth govèrn centrau espanhòl o directament dera Generalitat de Catalunha ?
Que sòi totun estomagat deth hèt qu'un sol parent e posque demandar qu'era classa e's hàcie en castelhan e que tots eths autes eslhèves dera classa aurén a plegar-s'i. Se i a metem trenta mainats ena classa, sonque tà un, que van tots cambiar de lenca sense demandar eth avís aths deths vint-a-nau autes. E se un parent e's pòsa en contra e vòu era escòla en catalan entath sué dròlle, qué çò que's passa, e l'envian a péisher ? S'ei eth cas non solament que voleré díser qu'eth castelhan a près eth pas sus eth catalan coma lenca prefrenta d'un punt de vista legau mès tanben qu'aquera desicion seré antidemocratica (çò de segur) en pormor que balha un dret ara minoritat contre era volentat dera majoritat.
Desobendiéncia ! Independéncia !
Sens doblidar - amens d'ésser completament abestit per sos parents, çò qu'es pas impossible - que lo diago se'n fot. Son los parents que vòlon emmerdar lo monde, encoratjats per lo PP.
Ont es la democracia lingüistica regionala ? Es una vergonha de veire qu'un estat imperialista laisha jamai en patz los Autres. Li cal sempre cercar nièras. Se los araneses vòlon que se parle ancara occitan gascon aranés al lor, cal evitar ce que se passa sempre en Occitània administraa per França.
Se un monolingüe francofòne arriba dins una conversacion occitana, los occitans van se méter a parlar francés (per "cortesia"). Impossible per lo francofòne de s'integrar en occitan e desintegracion de la majoritat lingüistica occitana locala, perqué lo sistèma imperial o demanda e o favorisa. Al revenge a París un occitanofòne veirà ren la majoritat cambiar de lenga per el.
davant l'enormitat d'una tala decision, constati qu'internet en escafant lei frontieras e lei confins es un instrument tot poderos au servici de causas que diferentament seriàn escondudas e ocultadas, aquéu vou dire qu'un solet castilhano-parlant es superior cent mil cops mai qu'un escolan catalan, visque l'egalitat !
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari