Lo deputat d’ÈRC, Joan Tardà, foguèt expulsat de la tribuna dels orators del Congrès dels Deputats espanhòl per parlar en catalan. Tardà protestava contra l’atac que lo catalan subís a l’escòla (amb l’occitan en Aran), segon la resolucion de dimècres del Tribunal Superior de Justícia de Catalonha.
 
Tardà comencèt son intervencion en espanhòl en disent: “Mercés, Sénher President. Sénhers deputats, ièr un tribunal dictèt en Catalonha qu’un sol escolan que demande lo cambiament de lenga vèrs lo castelhan obliga tota la sala de cambiar de lenga. La majoritat del Partit Popular a totjorn defendut que çò que val per Catalonha val per Espanha tota. En logic parallelisme e en justa correspondéncia, comprenèm qu’un sol deputat qu’exigisca dins aquesta cambra lo cambiament de lenga vèrs lo catalan obliga tanben tota la sala a cambiar de lenga. Alavetz, amb la vòstra permission, vos parlarai en catalan”. A partir d’aquí, lo deputat passèt al catalan, mas lo president del Congrès, Jesús Posada, diguèt a Tardà: “Provoquetz pas un conflicte innecessari que mena pas a res”. “Se vos entestatz de parlar [en catalan], m’obligatz de vos refusar la paraula, e vos demandi, doncas, que i sosquetz, perque arribaretz pas enluòc”, çò diguèt Posada, que li demandèt de complir lo reglament. “E mai se la vòstra argumentacion pòt èsser interessanta, se pòt pas aplicar”, çò apondèt lo president del Congrès dels Deputats espanhòl.
 
Posada l’interrompèt e l’avertiguèt. Mas Tardà contunhèt de parlar en catalan, çò que provoquèt que Posada lo tornèsse interrompre, e cerquèsse un dels articles del reglament qu’establís qu’el pòt expulsar de la tribuna del debat los deputats cridats a l’òrdre tres còps.
 
 
Vèni tu e tira-me d’aicí
 
Mentre que Posada cercava aquel article dins lo libret del reglament, Tardà escambièt qualques mots amb un deputat del PP qu’exigissiá que quitèsse la tribuna dels orators. Tardà respondèt en catalan: “Vèni tu e tira-me”, çò que provoquèt tornarmai la reaccion de Posada que remembrèt que “se pòt pas escambiar de vejaires entre deputats”.
 
Après legir l’article, Posada avertiguèt Tardà que, se contunhava en catalan, seriá expulsat. Tardà ensagèt de contunhar son intervencion en catalan e foguèt expulsat sul pic de la tribuna.
 
 
Solidaritat basca
 
Just après, veniá al deputat del partit basco Amaiur, Sabino Cuadra, que comencèt son intervencion en basco. Quand Posada lo cridèt a l’òrdre, diguèt qu’o fasiá “en solidaritat” amb Tardà e en “protèsta” perque l’usatge de las lengas cooficialas es pas permés dins la cambra parlamentària espanhòla.