Las reduccions previstas sul budget de la Defensa aurián pogut menar l’èx-ministre Jérôme Cahuzac a la fin de sa carrièra politica, segon çò que publiquèt ièr lo setmanièr soís L’Hebdo. “L’armada a agut sa pèl. Se nos pòt pas atacar impunament. El voliá la nòstra mòrt. L’avèm agut. E d’autres ministres poirián seguir s’Hollande contunha sus aquel camin”.

Abans sa demission, l’èx-ministre del Budget considerava l’armada coma un pes gras que caliá aleugierir, fins al ponch de ne redusir lo budget a un miliard d’èuros en 2014, e qualques miliards previstes per las annadas seguentas. En concret, las previsions de Cahuzac èran de suprimir 31 regiments de l’armada de tèrra, de vendre lo pòrtavions Charles-de-Gaulle, d’anullar las comandas d’elicoptèrs Tigre e de dos sosmarins nuclears Barracuda, d’estancar la produccion dels avions Rafale e dels transportadors Airbus A400M, e mai de suprimir aperaquí 51 000 emplecs. Se prevesiá tanplan de barrar de basas francesas a l’estrange e de redusir los budgets interiors.
 
Segon L’Hebdo, aquelas mesuras serián estadas jutjadas inacceptablas de l’interior. Dins lo quite Ministèri de la Defensa, se disiá que se riscava l’estatut de França coma granda poténcia internacionala, e pensavan que la Republica poiriá pèrdre son sèti dins lo Conselh de Seguretat de l’ÒNU.
 
Alavetz, abans que lo president francés François Hollande se prononcièsse lo 22 de març sul projècte de lei de Cahuzac, lo 19 del meteis mes, li calguèt far front a la dobertura d’una enquèsta judiciària. Demissionèt lo meteis jorn e, qualques jorns puèi, lo 2 d’abril, confessèt a la justícia d’aver un compte non declarat a l’estrange en destruissent per totjorn sa carrièra politica.
 
Segon L’Hebdo, totes los eveniments qu’an destruit la carrièra de Cahuzac son pas brica un azard. “L’armada a agut sa pèl. Se nos pòt pas atacar impunament. El voliá la nòstra mòrt. L’avèm agut. E d’autres ministres poirián seguir s’Hollande contunha sus aquel camin”, çò ditz una de las fonts consultadas pel setmanièr soís, que soslinha que las autoritats de Genèva son estonadas de la precision de las informacions qu’aviá la justícia francesa sul compte de Cahuzac en Soïssa. Aquela precision portariá la marca de l’intervencion dels servicis d’informacion franceses que, segon L’Hebdo, aurián mai d’informacions sus d’autres responsables del govèrn per se’n servir se calguèsse.
 
La pression de l’armada e d’aquel lobby auriá forçat François Hollande a nomenar Bernard Cazeneuve coma remplaçant de Jérôme Cahuzac. S’agiriá d’un gèst en la direccion de l’armada e de l’indústria militara, pr’amor que —coma soslinha l’article de L’Hebdo— Cazeneuve es originari de Cherbourg-Octeville, una importanta basa maritima e de produccion militaroindustriala en Normandia.
 
Cal dire que Cahuzac considerava tanben que caliá refortir los mecanismes de contraròtle de las crompas del Ministèri de la Defensa, çò que li auriá costat l’enemistat del lobby militaroindustrial, lo qual auriá intrat 15 miliards de mens d’èuros per an.