China es a la tèsta del classament de la pena de mòrt, segon lo rapòrt d’Amnestia Internacionala (AI) de 2012. L’organizacion a denonciat l’opacitat de Pequin en aquela matèria e a alertat tanben d’una “escalada alarmanta” d’execucions en Iraq, dins un contèxt que l’abolicion de la pena de mòrt s’espandís pel Mond.

Amnestia Internacionala a comptat 682 execucions long de 2012 dins 21 païses. A aquela chifra, encara i cal apondre las de China, ont i a pas d’estatisticas disponiblas, mas ont, segon AI, s’executa “de milièrs” de personas; e lo país “executa tot sol mai de gents que la rèsta del Mond”.
 
Lo segond país del classament es Iran, amb 314 execucions, seguit d’Iraq, amb 129. Seguisson l’Arabia Saudita, amb 79; los Estats Units, amb 43; e Iemèn, amb 28.
 
Lo rapòrt del collectiu umanitari soslinha tanben que qualques païses coma Paquistan, Índia o Gàmbia, que fasiá longtemps qu’aplicavan pas la pena de mòrt, an represas las execucions.
 
En Euròpa e l’Asia Centrala, Bielorussia es lo sol país qu’aplica la pena de mòrt, amb 3 execucions. Dins lo continent american, solament dins los Estats Units se tua en nom de la justícia.
 
Los motius per las condemnacions son totjorn divèrses: l’assassinat, lo trafec de las drògas, los delictes economics, l’adultèri e lo blasfèmi.
 
Lo rapòrt conclutz qu’un de cada dètz païses del Mond aplican la pena de mòrt, e mai se s’es demostrat qu’aquel castigament crusèl a pas cap d’efièch dissuasiu.