Martin Malvy, president de la region Miègjorn-Pirenèus, aculhiguèt ièr, dijòus 11 d’abril, lo rector de l’Acadèmia de Tolosa, Olivier Dugrip, amb las collectivitats localas e las associacions membres del comitat de pilotatge de la convencion rectorat-region per l’ensenhament de l’occitan. Dins aquela amassada s’establiguèt un bilanç a mièg percors sus las accions menadas dins l’encastre d’aquela convencion, que sa tòca es de desvolopar l’ensenhament de la nòstra lenga dins la region del centre-sud d’Occitània.
 
Segon Malvy, lo bilanç es fòrça positiu: lo president diguèt que se son dobèrts 13 sits publics bilingües e doas Calandretas, mentre qu’an aumentat las ofèrtas d’ensenhament dins las escòlas primàrias e los collègis. Lo president regional apondiá qu’an aumentat lo nombre de plaças al concors especial occitan de recrutament dels professors de las escòlas.
 
Ça que la, cal notar qualques disfoncionaments. Dins qualques departaments, i a de plaças de professors o de conselhièrs pedagogics que poirián desaparéisser. Dins aquel sens, Malvy a dich qu’a “demandat al rectorat d’agachar en detalh aqueles diferents ponches e aital velhar a una melhora aplicacion de la convencion per arribar als objectius fixats”.
 
La Region Miègjorn-Pirenèus se ditz engatjada, dempuèi qualques ans, en una politica fòrta en favor de l’occitan. Ongan, 1,6 milions d’èuros es lo budget consagrat a la cultura e a la lenga occitanas, mai que mai a la transmission de la lenga.