Tres representants elegits regionalistas, lo deputat breton Paul Molac, l’eurodeputat còrs François Alfonsi e l’eurodeputat de Guadalope Jean-Jacob Bicep, foguèron recebuts lo 5 d’abril passat al Palais de l’Elisi per dos conselhièrs del president François Hollande. Lo motiu de la vesita èra de demandar un còp de barra energic per lo respècte e la promocion de las lengas e culturas minorizadas, mai que mai dins l’encastre educatiu.
 
Molac, Alfonsi e Bicep remembrèron que l’UNÈSCO considèra que las lengas minorizadas de França son condemnadas a la desaparicion se se manten l’inaccion governamentala abituala dels successius govèrns de París. Per aquela rason, demandèron a la presidéncia de la Republica de metre en practica de mesuras urgentas e eficientas per redreiçar la situacion.
 
Dins aquel sens, los tres comuniquèron lor “extrèma decepcion” per la decision del president de non complir son engatjament electoral de ratificar la Carta Europèa de las Lengas Minorizadas e Regionalas; car aquò èra comprés inicialament dins la reforma constitucionala del mes que ven. Cal remembrar qu’aquel engatjament èra lo numèro 56 de son programa electoral, e son incompliment fa que la paraula del president Hollande siá de pauca fisança. Segon los tres elegits, aquel fach es un senhal plan negatiu per la comunautat de personas e d’organizacions que trabalhan en favor de las lengas minorizadas de França.
 
Malgrat aquel panorama, los tres elegits foguèron escotats e, segon lors avaloracions, recebèron una responsa favorabla. Pasmens, caldrà veire se dins las setmanas venentas i a qualque indici de qualque accion presidenciala dins aquela linha.