Una cançon de 1939 es arribada al numèro 3 de las listas de vendas al Reialme Unit. La cançon Ding-Dong the Witch is Dead(Ding-Dong la Masca es Mòrta), del filme Lo Mague d’Òz, es la faiçon qu’an causida los britanics per dire adieu a Margaret Thatcher.

La cançon, compausada en 1939, s’es plaçada naut dins las listas de vendas, segon de donadas de The Official Charts. L’aire intrèt amb fòrça après la mòrt, diluns passat, de la femna politica britanica. De la desena posicion arribèt a la tresena dijòus passat amb mai de 20 000 còpias vendudas.
 
L’iniciativa es pas un azard. Lo succès de la cançon, interpretada per Judy Garland, es sortida d’una campanha de Facebook per “rendre omenatge” a la Dòna de Fèrre. De fach, i a d’autras versions del tèma, coma la d’Ella Fitzgerald en 1961, qu’an pojat tanben dins la lista, e mai s’an pas pogut aténher lo tòp 40.
 
La cançon, que fa un pauc mens d’una minuta, foguèt compausada per una de las darrièras scènas del filme Lo Mague d’Òz (The Wizard of Oz) quand Judy Garland e totes los abitants del Mond de Fantasiá celèbran la mòrt de la Masca Marrida de l’Èst.
 
 
Polemica dins la BBC
 
Lo succès de Ding-Dong la Masca es Mòrta a portat la polemica als rets socials, mas tanben al govèrn e a la quita BBC. La ràdio BBC 1 remembra cada dimenge las 40 cançons mai vendudas e aquò, per ara, compren la cançon qu’escarnís Thatcher.
 
La cadena a assegurat qu’a pensat de far “comprene dins lo programa de dimenge una explicacion sul succès de la cançon dels ans 1930 per lors auditors mai joves, e tanben sus la figura de Margaret Thatcher”.
 
Aquel afar fa pensar a aquel de la cançon satirica God Save the Queen (Dieu Salve la Reina) del grop punk Sex Pistols. En aquela escasença, en 1977, la cançon foguèt censurada e mai s’arribèt  al numèro 2 de las listas, amb l’etèrne dobte de saber s’arribèt quitament d’aténher lo numèro 1.
 
 
Recòrd istoric
 
La cançon Ding-Dong la Masca es Mòrta es venguda non solament un fenomèn mas pòt venir un recòrd istoric s’atenh lo numèro 1, perque serà lo single mai cort de l’istòria plaçat dins las dètz primièras plaças d’aquela lista.