Lo candidat del Partit Socialista Unit de Veneçuèla, Nicolás Maduro, s’es proclamat lo ganhant de las eleccions presidencialas que se son debanadas dimenge passat en Veneçuèla. Ça que la, lo candidat del chavisme a obtengut una victòria fòrça ajustada, amb 50,6% dels vòtes. L’aspirant opausant de la Plataforma d’Unitat Democratica, Henrique Capriles, n’a obtenguts 49,1%. La participacion en aquelas eleccions, convocadas après la mòrt d’Hugo Chávez, es estada de 78,7%.
 
“Avèm atengut un trionf electoral just, legal, constitucional, popular”, çò declarèt Maduro, qu’a qualificat lo resultat coma “una victòria del pòble e un omenatge a Chávez”.
 
Mas pr’amor dels resultats tant ajustats, Capriles a dich que los acceptarà pas fins que se compte cada vòte. E a demandat que i aja un audit.
 
“Uèi sètz vos e vòstre govèrn los vencuts”, çò diguèt Capriles. “Aicí l’imatge del país es un autre, e ieu respècti prigondament lo pòble que votèt per una autra opcion, mas exigissi de respècte pel pòble qu’a votat per ieu”.
 
E a demandat al comitat electoral “que dobrisca totas las caissas e que se compte cadun dels vòtes dels veneçolans, un per un”.
 
La polarizacion entre los simpatizants e los detractors de Chávez, e entre lors trionfes, amb de malescasudas, an marcats aqueles dètz jorns de campanha electorala, la mai corta de l’istòria de la democracia veneçolana.
 
Maduro cercava la legitimitat del vòte dels veneçolans per venir la nòva figura del chavisme e dirigir lo movement bolivarian après la mòrt de Chávez. Del sieu costat, Capriles s’èra erigit coma la votz autorizada de l’oposicion per criticar lo chavisme e sas politicas.