L’autoritat militara de Guantánamo ordenèt lo desplaçament dins de cèlas individualas pels presonièrs del modul VI, ont mai d’un trentenat son en cauma de la fam. Demest aqueles presonièrs, onze son alimentats per fòrça amb de serum.
 
Quand los gardians comencèron lo desplaçament, “qualques unes dels arrestats opausèron de resisténcia amb d’armas improvisadas”. En responsa, segon un pòrtavotz de la preson, se tirèt quatre balas “non letalas” per redusir los presonièrs, e mai se la font a pas especificat de quinas armas s’agís, se son de balas de goma o d’armas “teaser” que lançan de dards connectats a una font electrica.
 
Tot comencèt quand los presonièrs, la majoritat en cauma de la fam, cobriguèron las fenèstras e camèras installadas dins las cèlas comunas; las autoritats de la preson decidiguèron de los desplaçar dins de cèlas individualas pr’amor de la “santat e la seguretat dels arrestats”.
 
Una còla del personal medical de la preson avalorèt la situacion de cada presonièr, segon un comunicat que fa pas cap de referéncia al nombre de presonièrs que foguèron fin finala desplaçats. Se sap pas tanpauc quantes ferits i a agut.
 
Lo Pentagòn a reconegut que i a 30 presonièrs en cauma de la fam, d’un total de 166 que contunhan dins lo camp de Guantánamo. Per contra, lo Centre for Constitutional Rights (Centre pels Dreches Constitucionals), que representa qualques unes dels presonièrs e qu’a de contactes telefonics amb eles, a assegurat que son 130 los presonièrs en cauma de la fam.
 
La protèsta comencèt lo 6 de febrièr contra las “duras condicions disciplinàrias” dels presonièrs que vivon dins los barracons del camp.
 
Los avocats poguèron contactar los presonièrs fin finala lo mes passat, après insistir pendent doas setmanas, que las autoritats militaras los en empedissián.