L’èx-primièra ministra britanica Margaret Thatcher, que moriguèt diluns de la setmana passada, recebèt ièr un polemic omenatge dins las carrièras de Londres. Aquelas funeralhas d’estat an recebut de fòrtas criticas de l’oposicion e de las plataformas ciutadanas, que planhon de funeralhas d’aperaquí 12 000 èuros pagats amb l’argent dels contribuents, e que denóncian que las decisions de Thatcher foguèron fòrça agressivas per las classas popularas.
 
L’estat britanic organizèt un passacarrièra funèbre pel centre de Londres e una ceremònia dins la Catedrala Sant Pau, amb mai de dos mila convidats.
 
La ceremònia a Sant Pau se faguèt amb d’onors militars, mas fin finala i aguèt pas lo reng oficial de funeralhas d’estat, qu’es reservat a la monarquia e a de personalitats coma Isaac Newton, Horacio Nelson o Winston Churchill, amb aprobacion prèvia del parlament. Per contra, l’auròst aguèt l’estatut de “funeralhas ceremonialas”, amb lo consentiment e la participacion de la reina.
 
Lo dispositiu de seguretat previst inicialament per lo passacarrièra èra ja fòrça vast, amb mai de quatre mila agents d’Scotland Yard. Mas la paur de las protèstas socialas contra lo legat e l’omenatge a Thatcher portèt lo govèrn a plaçar fòrça agents per tot lo percors. Al delà, l’atemptat de Boston de diluns passat faguèt aumentar encara mai aquel desplegament de policièrs.