A Sant Sebastian (Bascoat), un mur de centenats de personas protegís de la polícia uèch joves que son acusats de terrorisme per aperténer a l’organizacion juvenila Segi.

L’Audiéncia Nacionala, un tribunal d’excepcion de l’estat espanhòl, ordenèt dimars passat l’arrèst e l’empresonament de uèch joves bascos per aperténer a l’organizacion Segi, illegalizada dins l’estat espanhòl en 2002.
 
Lo jutge los vòl far complir una pena de sièis ans de preson que la Cort Suprèma los condemnèt per apertenéncia a una organizacion terrorista. Dempuèi dimars passat, de centenats de manifestants son a far una paret umana al baloard de Sant Sebastian, en un espaci qu’an nomenat “Aske gunea” (l’Espaci de Libertat) per empedir que la polícia los empòrte.
 
Dins un manifèst (publicat tanben en catalan e en francés), lo grop de sosten als joves explica: “fòrça d’eles an denonciat que foguèron torturats pendent lo periòde d’incomunicacion e obligats de signar las autoinculpacions realizadas entre eles. Los daissèron liures après lor far pagar una caucion de milièrs d’èuros a cadun. Ara es arribada la senténcia definitiva e los vòlon menar en preson. Prèviament, an ja empresonat fòrça joves bascos per la meteissa rason e, dins l’avenir, l’estat espanhòl a l’intencion de contunhar en fasent çò meteis”.
 
Fins a dimars, un grop de gents anava a l’ostal de cadun dels uèch joves e los escortava fins al baloard e, après, fasiá çò meteis de retorn cap a l’ostal. Mas dempuèi dimars, la polícia a ja l’òrdre d’arrèst e pòt intrar en cò lor. Es per aquò qu’a l’ora d’ara son concentrats indefinidament al baloard, ont los protegís aquela “paret umana”.
 
Lo cònsol de Sant Sebastian, Juan Karlos Izagirre, exprimiguèt la solidaritat amb los joves e condemnèt la senténcia perque la considèra contrària als dreches civils e politics.
 
“Avèm decidit de bastir un mur popular e de crear Aske gunea al baloard. Los joves condemnats i son cada jorn, entornejats de centenats de personas”, çò ditz la plataforma de supòrt dins son manifèst.
 
Se pòt seguir las activitats de l’Aske gunea per Twitter.