Aperaquí  700 indigènas ocupèron dimars passat la Cambra dels Deputats de Brasil, a la vila de Brasília. La decision foguèt presa pels autoctòns pendent una audiéncia publica convocada pel grop parlamentari en defensa dels indigènas, que protèstan contra una propòsta d’emendament de la constitucion que demesiriá los dreches dels pòbles originaris.

Los ocupants disián que sortirián solament quand lo Burèu Director de la Cambra anullarà la comission que deu tractar lo polemic projècte d’emendament constitucional PEC 215. S’agís d’una propòsta d’emendament a la constitucion que cèrca de transferir a la cambra brasilièra dels deputats las demarcacions de las tèrras dels indigènas. Cal dire que la constitucion brasilièra, aprovada en 1988, prevei de dreches fòrça avançats a las comunautats indigènas, e lo PEC 215 cèrca de demesir aqueles dreches, que son pas jamai estats respectats.
 
Après las pressions dels indigènas, lo president del parlament, Henrique Eduardo Alves, recebèt los indigènas en audiéncia publica. Quant a las demandas de retirar lo PEC 215 e sa comission parlamentària, Alves diguèt que demandariá als caps dels partits politics que designèssen pas de representants per la comission de la PEC 215 fins que la situacion siá bona per totas las parts.
 
“Que non, sénher lo president, acceptam pas aquò. Alavetz, demorarem aicí per un temps indeterminat”. “Acceptam pas cap de tipe de negociacion o dialòg se referissent al PEC 215. Çò que nosautres volèm es que la Comission siá desfacha”, çò diguèt Sônia Guajajara, de l’APIB (Articulacion dels Pòbles Indigènas de Brasil).