Comencèt ièr a Marselha lo judici per l’escandal sanitari mondial causat per l’entrepresa Poly Implant Prothèse (PIP), qu’emplegava de gèl industrial per far de protèsis de popa de silicòna, qu’afectèt 500 000 femnas.

Ièr a 11h comencèt, al Pargue Chanòt de Marselha, lo tribunal excepcional qu’es a jutjar los cinc dirigents de PIP. Lo director, Jean-Claude Mas qu’a 73 ans, e los quatre autres dirigents afrontan d’acusacions per enganas e fraudariás, çò que lor pòt costar de penas de fins a cinc ans de preson e de multas de mai de 35 000 èuros.
 
Lo grand procès compren las 5127 demandantas e gaireben 300 avocats e se debana dins un espaci pas brica abitual. Pr’amor de sas grandas dimensions, la justícia a logat un airal de 4800 m² del Pargue d’Exposicions Chanòt, per 800 000 èuros.
 
Jean-Claude Mas escapava als contraròtles sanitaris de las autoritats francesas e europèas en emplegant un gèl industrial e non pas de silicòna sanitària, per fin d’estalviar d’argent. Segon los expèrts, PIP emplegava un gèl industrial illegal que costava 1,65 èuro per implant, en luòc d’emplegar de gèls certificats que còstan 11,55 èuros. Aquò supausèt per PIP un profièch èxtra d’un milion d’èuros per cada 100 000 implants fabricats.
 
En març de 2010, las autoritats sanitàrias francesas enebiguèron l’utilizacion de las protèsis PIP après divèrses cases de rompeduras. A la fin de 2011, aquel meteis organisme recomandèt de retirar totes los implants de PIP. Cal dire, pasmens, que PIP obteniá 84% de son profièch en defòra de l’estat francés, mai que mai de l’America del Sud.