I aviá d’expectacion per saber cossí se debanariá, e lo resultat es estat absoludament satisfasent. Las carrièras e plaças de Rodés se tenchurèron ièr de la color roja de l’occitanisme en un passacarrièra festiu e revendicatiu, dins la primièra experiéncia d’aquelas caracteristicas que se fa en Occitània.
Pendent tota la jornada, aquela vila emblematica de l’occitanisme aculhiguèt de taulièrs de las associacions, de cantadas en occitan al caireforc Sant Esteve, de fuòcs d’artifici, de teatre, de danças, de musica, d’aperitius gastronomics del terraire e quitament una messa en occitan dins la catedrala. Totas las expressions culturalas occitanas i èran presentas.
Lo plat de resisténcia, coma èra previsible, foguèt lo grand passacarrièra que prenguèt las carrièras a miègjorn. De desenats d’animators, de grops, de collectius o d’associacions folcloricas marchèron per Rodés, amassats per la defensa de la lenga e la cultura occitanas. Per los sosténer, de centenats de personas, vengudas de Roergue e d’autres païses occitans, participèron a aquel passacarrièra dins un ambient familial e festiu. Cal soslinhar, dins aquel sens, la bèla participacion de joves, tant dins lo passacarrièra coma dins lo public general.
Un dels eslogans mai entenduts foguèt “fièrs de la nòstra lenga”, una revendicacion fòrça viva qu’es venguda après que lo president de la Republica Francesa, lo socialista François Hollande, aja decidit d’ignorar una de sas promessas electoralas e de ratificar pas la Carta Europèa de las Lengas Regionalas e Minoritàrias. Lo mandatari francés a donat l’impression davant sos votants e ciutadans d’èsser messorguièr.
De ser, un concèrt del grop besierenc d’ska, Golamàs’K, e de la banda bearnesa d’street punk, Gojats of Hedars, acabèron una fèsta que caldrà recomençar l’an que ven.
Cal felicitar, doncas, la coordinacion occitana d’Avairon per aquela iniciativa e per lor entosiasme contagiós.
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
Ajustarai que :
1 Cal respectar lo trabalh pesuc fach pels occitanistas locals, amai s'aquela idèia novèla vos agrada pas.
2 e sustot : Cal respectar tot aquel monde que son venguts amb lor còr e qu'an trabalhat per aprestar aquela jornada que foguèt glaciala.
Qual a dich que Rodés deviá reglar 9 sègles d'enganas lo 20 d'abrial 2013 ? Qual a dich que Rodés seriá un Carcassona ter o un Tolosa bis ? Degun. Vautres, benlèu.
Cadun dins vòstre departament, anatz cercar de monde que son pas "occitanistas" e fasètz los parlar de la lenga occitana davant una camera ! Menatz-los dins un passacarrièira, eles que manifestan pas jamai contra res ni mai per res ! Veiretz cossí es complicat ! Aquò, l'an capitat. Èra un trabalh cap a la basa d'en primièr. E benlèu que i a mai de monde qu'òm pensa que serián prèstes a bolegar. Mas los cal anar cercar. S'avián fach una manifestacion "normala" aurián agut 200 personas. Pas mai e tres linhas dins lo jornal.
A pas fach avançar res al nivèl nacional, sai que, mès benlèu un bocinon dins lo cap de los que son venguts e qu'an tant fach per s'aprestar. Ieu ai menada una amiga qu'a pas jamai vist l'interèst de se mainar d'occitan. E ben dissabte a ser, o vesiá l'interèst. Es una peireta, segur, mas n'es una. E cresi pas que siá al mitan occitanista de traire de veren quand se fa quicòm a l'entorn de l'occitan enluòc. Se cal pas enganar d'enemic. Quantes de còps vesèm de fèstas coma aquela sans cap d'occitan ? Aquí l'occitan èra LO subjècte e lo monde son venguts per èsser actors (es aquí que lo passacarrièira es estat diferent de l'Estivada). La tòca èra de far cambiar lo vejaire del monde de Roergue per que valorizèsson lor cultura. E se quauqu'un organiza un passacarrièira endacòm mai, i anarai per solidaridat occitana e tanben per passar un bon moment ! E se sabiái jogar de musica, i anariái jogar de musica per ajustar de jòia.
Capitada de la mobilizacion e per l'esperit convivial e festiu
Mas...
Flaquesa dels discorses sus l'empont (aprenguèrem que lo patés èra d'occitan e que caliá faire de Roergue una tèrar d'Òc, mas res sus l'actualitat marrida ! )
Alara, cal trapar los mejans de ramosar lo mai de monde possible mas d'aver tanben de NHACA !!
Aquí en quauques mots...
Ieu i èri, a far sonar l'autbòi de la còsta lengadociana e lo graile de la Montanha Negra pel passa-carrièra, amb ua còla d'autres musicaires venguts d'un pauc pertot. Es vertat, ausiguèri pas tròp d'eslogans ni de revendicacions. Èra pas aisit de saupre perqué desfilàvem. Mas la manif èra plan organizada e èri aürós d'i èsser, a despieit del fred que pelava.
#3 Sens las eleitas socio-economicas (que fa ja un sègle qu'abandonèron complètament nòstra lenga) avèm la causida : amb o sens violénica.
Amb violénica, passarem per de terroristas coma los cosins d'Euskadi.
Sens violéncia, passam, coma o indica Tavan, per de folkoloristas e de mercants de tripons.
E pasmens, coma o clamèron los nòstres davancièrs, "avèm dicidit d'aver rason" !
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari