Los primièrs ministres de Serbia e Kosova, Ivica Dačić e Hashim Thaçi, menèron a tèrme un acòrdi istoric divendres passat a Brussèlas per normalizar lors relacions. Aquel acòrdi es determinant per que los dos païses pòscan aspirar a intrar dins l’Union Europèa. “Soi contenta de poder dire que la negociacion s’es conclusa. Lo tèxt es estat signat pels dos primièrs ministres”, çò diguèt la nauta representanta de la Politica Exteriora e la Seguretat de l’UE, Catherine Ashton, que faguèt la medatritz.
 
La cap de la diplomacia europèa felicitèt los dos dirigents “per lor determinacion d’aquestes darrièrs meses e pel coratge qu’an demostrat”. Ashton a pas volgut explicar lo contengut de l’acòrdi. “Es fòrça important çò que vesèm, es un pas per s’alonhar del passat e un pas mai près d’Euròpa per totes dos”, çò apondèt.
 
La normalizacion de las relacions entre Kosova e Serbia es una condicion determinanta per que los dos païses pòscan aspirar a far partida de l’Union Europèa. E mai se s’agís pas de la reconeissença formala de l’independéncia de Kosova per Serbia, la normalizacion de las relacions es una reconeissença explicita de l’existéncia de l’entitat politica kosovara.
 
 
L’acòrdi
 
L’acòrdi foguèt signat après qualques meses de negociacions tibadas entre lo primièr ministre sèrbe, Ivica Dačić, e lo sieu omològ kosovar, Hashim Thaçi, a Brussèlas. E mai se lo pacte es preliminar, es a l’encòp istoric perque es l’inici de la fin d’ans de conflictes e tensions. Supausa un ponch d’inici per la reconciliacion e per l’adesion a l’Union Europèa. Segon aquel acòrdi, lo comandant de la polícia regionala del nòrd de Kosova deu èsser sèrbe e la composicion del còrs de polícia deu coïncidir amb la distribucion demografica de las doas comunautats.
 
Lo Tribunal d’Apelacion de Kosova comptarà amb una còla de jutges sèrbokosovars per gerir los cases qu’impliquen de membres de la comunautat sèrba, e mai s’auràn d’aplicar las leis kosovaras.
 
Belgrad e Prishtina an acceptat de s’entrepachar pas dins lor objectiu d’avançar en l’integracion a l’Union Europèa. Pasmens, Serbia accèpta pas encara que Kosova pòsca èsser membre d’organizacions internacionalas coma l’ÒNU.
 
 
Espanha reconeis pas l’independéncia de Kosova
 
De fach, dijòus, lo Parlament Europèu demandèt a Espanha, Grècia, Romania, Eslovaquia e Chipre de reconéisser l’independéncia de Kosova. La raportaira de la mocion aprovada, l’austriana Ulrike Lunacek (Verds-ALE), planguèt qu’aqueles estats “ajan pas donat lor sosten als esfòrces realizats per Kosova”’.
 
Espanha es un dels cinc estats de l’Union Europèa qu’encara a pas aprovat la validitat de l’estat de Kosova. Es per aquò que, en session plenièra a l’Eurocambra, l’eurodeputada austriana Lunacek planguèt qu’encara aguèsson pas reconegut l’independéncia del país e diguèt qu’“o lor caldriá far per permetre a Kosova de participar a d’organizacions coma Europòl, Interpòl e als eveniments esportius internacionals”.