D’agents federals estatsunidencs an començat d’interrogar Dzhokhar Tsarnaev, lo suspècte d’èsser un dels autors dels atemptats de la setmana passada al maraton de Boston e que foguèt capturat viu. Segon divèrsas cadenas de television estatsunidencas, Tsarnaev intrèt en estat grèu dins l’espital Beth Israel de Boston, e respond a las questions per escrich. Pòt pas parlar a causa de las feridas qu’a al còl.
 
Per ara, respond a de questions coma s’aperten a qualque cellula terrorista internacionala. Las cadenas ABC e NBC asseguran que lo suspècte es desvelhat e respond a las questions de temps en temps. Al delà, segon de fonts prèpas a la recèrca, Dzhokhar Tsarnaev sap que son fraire Tamerlan es mòrt.
 
A prepaus de la ferida al còl que l’empedís de parlar, las autoritats dison que lo jove la se faguèt el meteis, e mai s’aviá dich que recebèt aquela bala dins la fusilhada ont moriguèt son fraire.
 
A l’ora d’ara, es pas clar se los recercaires li an legit sos dreches basics, çò que se coneis coma Declaracion de Miranda, una excepcion que s’aplica quand la seguretat publica es en perilh e qu’enebís al detengut lo drech de non declarar. L’excepcion sus la “seguretat publica” permet “als agents d’iniciar un interrogatòri limitat e centrat sus un objectiu sens avís prèvi, e permet al govèrn d’emplegar la declaracion coma una pròva dirècta” en una enquèsta, segon lo sit web de l’FBI.
 
Mentretant, lo procuraire trabalha per determinar qualas seràn las cargas que se li imputarà. Se, fin finala, es acusat de terrorisme, Tsarnaev poiriá èsser condemnat a la pena de mòrt. Las enquèstas an revelat que Dzhokhar e lo sieu fraire, mòrt en una fusilhada amb la polícia, avián una abondància d’armament e de municions, çò qu’a portat la polícia a pensar qu’avián l’intencion de cometre mai d’atacs e qu’agissián en solitaris.
 
Malgrat las questions qu’encara vesèm pas brica claras, las autoritats creson que cal pas aver paur d’un novèl atac similar.