Atal, a l’escòla primària publica Berthelot (que doas de sas classas son bilengas occitan-francés) se tendrà aqueste divendres 4 de mai una jornada interculturala ont, de matin e de vèspre, en seguida de trabalhs menats en classa, los mainatges poiràn seguir talhièrs dins mantunas lengas: alemand, anglés, arabi, francés, occitan, lengas de Novèla Caledonia e percussions d’Africa, lenga dels signes.

 

En serada, l’umorista Andrieu Clamenç dirà sas Relucadas (20h30; Centre social de Grasalhas). Per sa part, lo dijòus 10 e lo divendres 11 de mai, la Calandreta de Ciutat coordonarà un còp de mai activitats per la Fèsta de la Natura (jol nom local d’Al Grand Prat de Ciutat) en proposant a totes los escolans de la vila e de l’aglomeracion de Carcassona de talhièrs, en partenariat amb d’associacions ecologicas o non: plantas, insèctes, abelhas, aucèls, aiga, òrts, contes,…

 

Las activitats se debanaràn tanplan a Ciutat coma dins los locals novèls de l’Escòla de Puèg Marin ont los calandrons meton en plaça un vergièr, preparan una senda botanica, an dobèrt una ostalariá pels insèctes e un espaci-refugi pels aucèls.

 

 

Alan Roch