Lo projècte de lei sul maridatge omosexual, una de las principalas promessas electoralas de Françoise Hollande, foguèt aprovat ièr a l’Assemblada Nacionala francesa, après èsser aprovat pel Senat lo 12 d’abril passat. Aquela aprobacion definitiva es estada possibla gràcias a la majoritat d’esquèrra. Ça que la, a pas pogut fugir la polemica que sos detractors an tramada e, aquestas darrièras setmanas, eles se son manifestats en massa per las carrièras de divèrsas vilas de l’estat per protestar contra lo maridatge gai e contra l’adopcion d’enfants per de parelhs del meteis sèxe.
 
 
Polemica e agressions
 
L’oposicion a la lei es basicament formada de membres de partits de drecha e d’extrèma drecha, amb lo sosten de la Glèisa Catolica. Se son amassats dins la plataforma La Manif pour Tous, una sòrta de Tea Party a la francesa, qu’a coma figura visibla l’umorista catolica Frigide Barjot.
 
Las protèstas son estadas multitudinàrias. De desenats de milièrs de manifestants an manifestat per carrièras. Tanplan an protestat los defensors dels dreches dels omosexuals. I a agut quitament de violéncias, fins al ponch que lo quite president François Hollande denonciava, fa qualques jorns, los actes “omofòbs e violents” après las agressions dins una manifestacion e los atacs contra qualques bars gais.
 
 
De menaças grèvas
 
Abans ièr, los servicis postals de l’Assemblada francesa recebèron una letra amb de menaças e de polvera, adreiçada al president de l’Assemblada, lo socialista Claude Bartolone. Òm i aviá escrich “D’explosius, excepcionalament sens mecha”, signat per l’“Interaccion de las Fòrças de l’Òrdre”. La letra disiá: “Los nòstres metòdes son mai radicals e expeditius que las manifestacions. Avètz volgut la guèrra e l’avètz aicí”. L’autor, o lo grop responsable de l’enviament, exigissiá que s’ajornèsse lo vòte definitiu d’ièr perque considerava que “lo maridatge per totes” equivaliá a suprimir lo maridatge. La letra menaçava Bartolone e sa “familha politica”, que disiá que podián “sofrir fisicament”.
 
Lo procuraire antiterrorista a dobèrt una enquèsta, qu’èra de fach ja dobèrta a causa d’autras letras recebudas, signadas pel meteis grop. Foguèron mandadas a la fin de març a qualques jornalistas e al jutge que metèt en acusacion l’èx-president Nicolas Sarkozy, Jean-Michel Gentil.
 
 
Lo maridatge omosexual
 
Lo maridatge omosexual o maridatge entre personas del meteis sèxe es la reconeissença sociala, culturala e juridica que regula la relacion e la convivéncia de doas personas del meteis sèxe, amb los meteisses requisits e efièches que los existents pels maridatges entre personas de sèxes diferents.
 
Coma alternativa a aquela institucion, existisson d’autras institucions civilas, dins qualques païses, e amb diferentas denominacions coma “parelhs de fach”, “unions civilas” o “concubinatges”, e mai se son sovent criticadas pels movements de defensa dels dreches dels omosexuals per èsser insufisentas o discriminatòrias.
 
A l’ora d’ara, lo maridatge omosexual es totalament legal dins dotze estats: Belgica, Canadà, Norvègia, Danemarc, Espanha, Portugal, los Païses Basses, Sud-Africa, Suècia, Islàndia, Uruguai e Argentina. Es tanben legal dins qualques estats dels Estats Units (Connecticut, Washington, Washington DC, Iowa, Massachusetts, Nòu Hampshire, Vermont e Nòva York) e dins los territòris amerindians dels coquilles d’Oregon e dels suquamishes de Washington. En Brasil, lo maridatge entre personas del meteis sèxe es illegal amb l’excepcion de l’estat d’Alagoas, que lo legalizèt en genièr de 2012.
 
E mai se los Païses Basses foguèron lo primièr estat a legalizar lo maridatge omosexual, Espanha foguèt lo primièr que ne reconeguèt totes los dreches, en i comprenent lo d’adopcion, jols meteisses tèrmes e jos la meteissa lei. Just çò que França ven d’aprovar.