Spanghero, l’entrepresa de carn de Castèlnòu d’Arri (Lauragués), licenciarà a partir de la setmana que ven 160 personas. Aital o anoncièt dimars passat Barthélémy Aguerre, lo president de la societat.

“La setmana que ven i aurà un un PSE (plan de salvagàrdia de l’emplec). Uèi sus 240 titulars i a 80 personas que trabalhan. Avèm ensajat de manténer l’activitat per aquelas 80 personas e los autres seràn sens dobte licenciats”, çò diguèt Aguerre a France 3 Baiona a prepaus d’Spanghero, la societat que presidís. Lo jornalista li demandèt: “Alavetz son 160 licenciaments?”. “Òc, que òc”, çò respondèt Aguerre. “A partir de la setmana que ven, al pus lèu”, çò apondèt.
 
Dimars de ser, Aguerre respondiá a L’Indépendant qu’èra una decision del liquidator judiciari. D’efièch, lo 19 d’abril passat, lo tribunal de comèrci prononcièt la mesa en liquidacion judiciària de l’entrepresa, amb una continuitat d’activitat de tres meses, renovelabla un segond còp.
 
“Se lo govèrn tròba de trabalh la setmana que ven per 160 personas, caldrà pas far los licenciaments. Disi que dins la situacion actuala, pr’amor del levatge de l’aprobacion [venent de l’estat], avèm perdut los nòstres clients”, çò apondiá.
 
Segon Jean-Luc Fraisse, del sindicat CFDT, l’argument del levatge de l’aprobacion, en pretendent desresponsabilizar la direccion d’Spanghero, es pas acceptable. “Es pas lo govèrn qu’a crompat 550 tonas de carn de caval, ni lo govèrn qu’a importat de carn de feda talhada mecanicament.”