L’Assemblada de Corsega deviá presentar ièr una proposicion per declarar lo còrs lenga oficiala dins l’illa, amb lo francés, mas s’es suspenduda la session d’ièr e d’uèi a causa de l’assassinat del president del Pargue Natural Regional, Jean-Luc Chiappini.

La lenga còrsa, e mai s’es emplegada en la senhaletica e s’ensenha dins qualques escòlas de Corsega, es pas reconeguda oficialament per l’estat francés. De fach, l’estat francés reconeis pas cap de las mal nomenadas lengas regionalas. Mas aquò podiá començar a cambiar se s’aprovava una proposicion de cooficialitat elaborada per Pierre Ghionga, president del Conselh de la Lenga Còrsa, e que ne caliá debatre ièr e uèi a l’Assemblada de Corsega. La session s’es suspenduda pr’amor de l’assassinat del president del Pargue Natural Regional, Jean-Luc Chiappini.
 
Lo tèxt presentat pel president del Conselh de la Lenga Còrsa, un organisme creat per la Collectivitat Territoriala de Corsega en 2005 e votat per l’Assemblada de Corsega en genièr de 2007, prevei l’usatge del còrs dins las escòlas e dins las relacions amb l’administracion publica.
 
Ghionga espèra una “majoritat fòrta” en favor de la proposicion al vòte, pr’amor que fa dos ans, trenta sièis deputats votèron una mocion favorabla a la cooficialitat.
 
Se la proposicion de cooficialitat capita ben, caldrà reformar la constitucion francesa per que la cooficialitat pòsca intrar en vigor.
 
Ça que la, en 2009, de deputats independentistas presentèron una mocion en favor de declarar l’oficialitat del còrs e que foguèt rebutada per 28 vòtes en contra en fàcia de 19 en favor.