Actualitats
Documentaris sus era cultura orau gascona deth Ostau Comengés
Pendent eth mes de mai que s'a programat era projeccion deths documentaris en diversis vilatges de Comenge e de Coserans
Eth Ostau Comengés qu'a programat era projeccion deths sòns documentaris sus era cultura orau gascona aguesta debuta deth mes de mai en diversis vilatges.
Aqueris documentaris qu'an coma objectiu de transméter era cultura orau dera Gasconha pirenenca. Era còlha deth Ostau Comengés que trabalhe en ua zòna que correspon ath domeni deth gascon pirenenc orientau: Varossa, Comenge, Coserans. Qu'arrencontren gents qu'an aprés eth occitan ena familha e que hèn enquèstas etnologicas en occitan gascon.
Non sonque se vò amassar eth mès gran nombre de testimoniatges, mès que pensen tanben ara difusion d'aquera "matèria prumèra". Qu'é pr'amor d'aquò que hèn documentaris autoproduïts, disponibles en DVD (dab sostitolatge en occitan o en francés) e qu'organizen projeccions en partenariat en ame associacions, salas de cinema, escòlas, municipalitats...
Peth moment, eth Ostau Comengés qu'a hèt 5 documentaris:
- Eths Erbejaires (2009, on explican se quin erbejavan d'autis còps ena vath deth Arbàs)
- De Cornudèra a Palomèra (2010, sus eras activitats umanas en montanha, entram Comenge e Coserans)
- Era Mòla de Naut (2011, sus era mòla de Casavèth)
- Eths Segaires (2012, sus era arrecòlta deth blat en Comenge e Coserans)
- Tot un hormatge (2012, sus era fabricacion deth hormatge peths oelhèrs dera Varossa).
Eths DVD que's pòden tanben crompar en tot contactar damb eth Ostau Comengés: 15 € / DVD + eth mandadís.
Eths Segaires que hè partida dera seleccion de Llanterna Digital.
Eras projeccions deths documentaris:
- Dissabde 5 de mai, a 17 oras, a Saleish (Comenge) > projeccion deths Segaires e dera Mòla de Naut
- Dimars 8 de mai, a 16 oras, a Shenh (Comenge) > projeccion deths Segaires e dera Mòla de Naut
- Divendres 11 de mai, a 21 oras, a Sent Guironç (Coserans) > projeccion deths Segaires e de Tot un hormatge! ; cançons occitanas en ame eths Birossans e Voix Si, Voix La (corala dera escòla de musica)
- Divendres 1èr de junh, a 20 oras 30, a Saleishan (Comenge), projeccion deths Segaires e dera Mòla de Naut
Joan Pau Ferré
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
Qu'èi ua causa bèra de poder perméter au mond larg (occitanista e non occitanista) d'escotar ua racòlta de documents gessits dera transmission orau. Qu'èi eth hiu roge dera lenga occitana, que d'uns aurien volgut copar, que nos èi tornar donat
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari