“Sota ‘o sorelh de Sant Tropetz” (títol original en francés: “Sous le soleil de Saint-Tropez”) es una seria televisuala francesa difusaia cada dissabta a 17 h 10 despúi  ‘o 2 de mars de 2013 sus ‘a caena monegascofrancesa Tele Monte Carlo (TMC). Es una seria deribaia, valent a dir un tipe de seguia ona (ont) se tròba de ligames damb ‘a seria “Sota ‘o sorelh” (títol original en francés “Sous le Soleil”) difusaia de 1996 a 2008 sus ‘a caena francesa TF1, e emesa despúi 2004 en Itàlia sus Rete 4 (per ‘a difusion en Espanha, avema menga informacion). Foguèt un d’u programas franceses ’u mai difusits en lo Mondo: rebateat “Saint-Tropez” a l’internacional, ‘a seria s’exportèt sus un centenal de caene TV nacionale. En 2003 aquela seria obtenguèt ‘o “Premi d‘a seria d‘access-prime-time”, decernit per de collegians d‘a region Provença-Alps-Còsta d‘Azur au Festenal d ‘a ficcion TV de Sant Tropetz. Aicesta seria aguèt un moron de fans en lo Mondo, coma en Quebec. A prepaus de l ‘arrest d ‘a seria en 2008, se diguèt que: “‘a comuna de Sant Tropetz, que l’economia depende en part dau fulheton, en mai d’u sens fans, avían pròpi mal recebut ‘a nòva, après mai d ‘onze ans de difusion”. Per parentèsi, aquel comentari me fa pensar aus toristas qu ‘ai ja sentits dir: “ben fortunament que sema aicí da vosautres per vos far víver” (bien heureusement que nous sommes là chez vous pour vous faire vivre).
 
Porema considerar qu‘aquesta seria ese ben l’àvia de plhen de serie e de telefilmes d’inspiracion “sudistas”. Avema “Mai bèla ‘a vita” (fr. “Plus belle la vie”) seria difusaia sus la caena de TV France 3 despui 2004. Coma de serie mai plhajesque, mai exotique (donca mens urbane) avema “Campatge paraís” (títol original en francés: “Camping Paradis”) seria difusaia sus TF1 despúi 2006, que cal notar qu ‘a primiera sason foguèt filmaia au campatge “Les Coteaux de la Marine” (4’stele) sus ‘o plhan de Valençòla en Provença prealpenca, qu ‘a 2a e 3a sasons foguèran filmaie au campatge “Les Gorges du Chambon” (4’stele) d ‘aimostier en Lemosin (Charanta lemosina) e que partent d ‘a 4a sason foguèt filmaia au campatge de “l‘arquet”, pròche dau Martegue en Provença. Coma descendenta de l’esperit “exòtico” poreriam citar egalament ‘a seria “Fúrmine (ò Tròn)” (en fr. “Foudre”) difusaia de 2007 a 2011 sus ‘a caena de TV France 2 que Joséphine Jobert, ‘a soa actora principala, s ‘ajusta aus actors nòus de “Sota ‘o sorelh de Sant Tropetz”.
 
D ‘actors coma Avy Marciano participèran a “Sota ‘o sorelh” pi juguèran dintr ‘a seria “Mai bèla ‘a vita” e avema d ‘autres actors coma l‘actora baionesa Bénédicte Delmas que decidèt de se consacrar a ‘a realisacian en devenent realisatora regulara de “Mai bèla ‘a vita”. Coma ligame d ‘actors renovats, mas aquel còup qu ‘an jugat dintre “Plus belle la vie” e que fan ‘a soa aparician dintre “Sota ‘o sorelh de Sant Tropetz” trobema entre autres l‘actora gascona Valérie Baurens coma Aurélie Vaneck ò l ‘actor Farouk Bermouga. Malastrosament, notema neshuna (ò quasi neshuna) presença d‘a lenga occitana, sota ‘a forma de “l‘accent” en cò de neshun personatge en l ‘anciana seria coma ‘a nòva.
 
Un pauc coma ‘a cançon “ ‘a misèria ese mens peníbila au sorelh”, e’ paraule dau genérico (D.R., citacions tiraie de Wikipèdia) son aquele:
 
Je vois le ciel aussi bleu que dans nos rêves Quand nos cœurs parlent et se noient dans la lumière Je vois l ‘azur aussi pur que notre terre - erre - erre Sous le soleil, je t’emmène Là où règnent Nos larmes et nos joies Sous le soleil, je ressens Le sable et le vent La mer où scintille la soie Sous le soleil, pense à nous Oublie tout le reste On se donne rendez-vous Sous le soleil, n’importe où On s ‘aime, on s’en fout Le monde est à nous Sous le soleil
 
Que se considere qu ‘aquela mena de seria fossa ‘o rebat d ‘a realitat d’u gents d ‘occitània ona (ont) foguèt virat (Sant Tropetz, Marselha, Valençòla, Aimostier...), e quitament trobéssam neshun element d ‘occitanitat (lenga, accent, patronimes d’u personatges, consideracions a l’entòrn de l ‘occitan dau país...), poreriam positivar en dir qu ‘occitània -e particularament que l ‘occitània maritima (còsta miegterranea e atlantica)-, es ‘o lueg de filmatges e fa ancara pantaisar’u telespectators dau Mondo entier.
 
Benlèu aus actors e scenaristas de sensibilitat occitanista d’investir aüra aquelu domènis artísticos per far parlar ‘o país e s’i interessar, coma ese, dambé ‘a soa part d‘occitanitat.
 
 
 
 
La zapaira