Un òme a fusilhat davant la pòrta del Palais Chigi, lo burèu del primièr ministre a Roma, qualques minutas abans la presa de possession al Palais del Quirinal del nòu govèrn italian de coalicion, que ven de lo formar lo centrista Enrico Letta, del Partit Democrata (PD). Dos policièrs e una persona son estats ferits. Lo tiraire es estat detengut.

L’òme es estat identificat coma Luigi Preiti, un calabrés de 49 ans; a pogut tirar cinc còps qu’an ferit los dos agents e una femna.
 
L’incident se debanèt ièr a 11h30 quand l’atacant tirèt dins la plaça e provoquèt la panica entre los pedons. Lo tiraire es espitalizat dins lo Centre Medical San Giovanni per una ferida al cap, produsida pendent la detencion. Las primièras investigacions indican qu’a agit tot sol.
 
Preiti auriá confessat a la polícia qu’a tirat près de la residéncia del primièr ministre perque “voliá tuar los politicians”. “O a confessat tot. Sembla pas una persona desequilibrada. Es un òme amb fòrça problèmas qu’èra desesperat”, çò declarèt lo procuraire Pierfilippo Laviani après la primièra enquèsta al près de l’òme, qu’es divorciat e al caumatge. “Voliá tirar en general contra los politicians, mas pr’amor que i podiá pas arribar, a tirat contra la polícia”, çò apondèt.
 
La fusilhada se passèt un pauc abans la presa de possession del nòu govèrn de coalicion italiana, clavat ièr per Enrico Letta. La ceremònia se fa pas al Palais Chigi, mas al sèti del cap d’estat, conegut coma lo Palais del Quirinal, a un quilomètre de distància.