Quaranta personas feridas quand la polícia escampilhèt una marcha en favor de l’autodeterminacion. I aguèt de protèstas a Al Ayun, Bojadòr e As Smara. An renovelada la mission de la MINURSO per un an, sens cap d’atribucion nòva en matèria de supervision dels dreches umans.

Lo president de la Republica Aràbia Saharauí Democratica (RASD), Muhammad Abd Al Aziz, remembrèt dimenge passat a l’ÒNU la responsabilitat d’aquela organizacion internacionala en la proteccion dels dreches umans al Sahara Occidental. Abd Al Aziz, qu’es tanben secretari general del Front Polisario, reclamèt l’implicacion de l’ÒNU après que de centenats de manifestants independentistas foguèron reprimits per las fòrças d’ocupacion marroquinas quand marchavan per las carrièras d’Al Ayun (El Aaiún, Laâyoune), en revendicar lo drech d’autodeterminacion.
 
La marcha èra pacifica, çò dison de fonts sul terren d’Amnestia Internacionala a un correspondent de l’AFP, fins que la polícia empleguèsse una “fòrça excessiva” per escampilhar los manifestants. A comptar d’aquel moment, se produsiguèron d’afrontaments que daissèron un quarantenat de personas feridas, dont 8 policièrs e almens 30 manifestants.
 
Segon lo jornal espanhòl El País, i aguèt tanben de manifestacions dins las vilas d’As Smara e Bojadòr. Totas doas, coma Al Ayun, son dins la zòna del Sahara Occidental ocupada per Marròc.
 
 
Un an de mai de MINURSO, sens mai d’atribucions
 
Las protèstas arriban just après que lo Conselh de Seguretat de las Nacions Unidas aja renovelat per un an de mai la Mission de las Nacions Unidas pel Referendum al Sahara Occidental (MINURSO), mas sens ampliar lo sieu mandat per supervisar lo compliment dels dreches umans dins lo territòri de l’èx-colònia espanhòla. L’ampliacion del mandat per verificar aquela question foguèt una proposicion dels Estats Units, mas trobèt l’oposicion de Marròc e de sos aliats europèus: Espanha e França. Fin finala, lo renovelament del mandat a pas comprés cap de question nòva restacada als dreches umans.

 
 
 
 
 
 
 
 
Aqueste article ven del jornal catalan Nationalia.cat, amb qui Jornalet a un acòrdi de cooperacion.