Son ja 100, sus 166, los presonièrs de la preson de Guantánamo, en Cuba, en cauma de la fam. La protèsta comencèt lo 6 de febrièr, fa ara gaireben tres meses. De mai en mai de presonièrs se son engatjats dins la cauma. Aital vòlon denonciar las “duras condicions disciplinàrias” que patisson dins la basa estatsunidenca.

La situacion ven critica. Un vintenat de presonièrs son alimentats per fòrça, per mejan de vias amb de noiriments, e cinc dels caumaires poirián ja èsser espitalizats.
 
La nòva chifra oficiala dels presonièrs en cauma de la fam l’anoncièt lo pòrtavotz de Guantánamo, Samuel Horse, per mejan d’un e-mail. S’agís d’una aumentacion notabla a respècte de la darrièra chifra reconeguda, 84, que diguèt fa dos diluns.
 
De fach, segon d’organizacions internacionalas coma lo Centre per los Dreches Constitucionals (Center for Constitutional Rights), los presonièrs en cauma de la fam son 130, una chifra, pasmens, refusada pel Pentagòn.
 
La majoritat dels presonièrs en cauma de la fam son al Camp 6, lo mai grand de la preson. Ailà, fa doas setmanas, las autoritats militaras decidiguèron de separar los presonièrs del modul 6 en de cellulas individualas e l’accion s’acabèt amb un afrontament entre los gardians e los presonièrs, qu’“ofriguèron de resisténcia amb d’armas improvisadas”.
 
La majoritat dels presonièrs fa dètz ans que son dins lo camp de concentracion sens cap d’acusacion formala e sens cap de prevision d’èsser repatriats o menats a d’autres païses.