L’acòrdi sus l’emplec devesís los actes del primièr de mai dins l’estat francés ont, ça que la, totes los sindicats marcharàn contra l’austeritat. En clau occitana, Libertat! organiza una jornada a Pau amb manifestacion, repais popular, documentaris e debats.

Los sindicats de l’estat francés festejan ongan lo 1r de mai en essent devesits a prepaus de l’acòrdi sus l’emplec. La CGT, opausada al tèxt, manifèsta per tot l’estat, la CFDT organiza amb doas autras centralas reformistas un acamp inedit a Rems, e FO manifestarà tota sola.
 
Lo projècte de lei sus l’assegurament del trabalh, que serà definitivament adoptat dins lo Parlament francés lo 14 de mai, a portat aquela desunion sindicala. CGT e CFDT avián manifestat amassa lo 1r de mai pendent cinc ans, jos la presidéncia de Sarkozy.
 
Ça que la, totes los sindicats son unanims per refusar las politicas d’austeritat en Euròpa. “En fasent d’austeritat anam totes morir amb de deficits zèro”, çò disiá diluns Jean-Claude Mailly, cap d’FO.
 
CGT, FSU e Solidaires apèlan uèi a 279 manifestacions e acamps dins tot l’estat, per una mobilizacion ont se marcarà lo refús de l’austeritat e de l’acòrdi sus lo trabalh.
 
Lo numèro un de la CGT, Thierry Lepaon, aviá lançat una crida a la CFDT per manifestar unitàriament “malgrat los desacòrdis”. Segon Lepaon, “es un cèrt drama pels salariats perque l’unitat sindicala es determinanta, sèm a mal capitar e o planhi”, çò diguèt.
 
En clau occitana, es Libertat! qu’a convocat una jornada a Pau mejançant un repais popular, amb d’aperitius e de grasilhadas après la manifestacion matinala, la projeccion d’un documentari sus Marinaleda, la vila autonòma d’Andalosia, e de debats.
 
Avèm pas d’informacions per çò qu’es dels actes en Aran, Mónegue o las Valadas.