Un autre escandal sanitari poiriá tocar Occitània per rapòrt a l’alimentacion, aqueste còp en visant lo fetge gras. La Dépêche raportava ièr que cinc èx-embutaires de la societat bearnesa Euralis acusèren lo primièr productor mondial de fetge gras de respectar pas l’indicacion geografica protegida (IGP), dicha “Sud-Oèst” (coordenadas dels ponches cardinals segon lo vejaire parisenc).
 
Los èx-embutaires dison que la societat agroalimentària, plaçada a Lescar (Bearn), emplegariá de guits malauts tractats amb d’antibiotics. Los cinc faguèron lor denóncia per engana al près del ministèri public de Pau, fa un an. Un d’eles, Philippe Lapaque, denóncia las marridas practicas d’Euralis en detalh sul sieu blòg.
 
De son costat, Euralis parla d’“acusacions infondadas de cinc ancians productors”. “La societat afirma qu’exercís un contraròtle precís destinat a assegurar la perfiècha traçabilitat dels produches”, çò ditz la societat cooperativa dins un comunicat qu’apond, al delà, que s’exercís tanben un contraròtle independent amb Qualisud, un organisme independent aprovat pel Ministèri de l’Agricultura.
 
Euralis justifica atanben l’utilizacion de medicaments. “Per çò qu’es de l’administracion d’antibiotics, es excepcionala e se fa pas sonque après intervencion veterinària”. En mai d’aquò, “en cas qu’un guit aja recebut un tractament antibiotic, perdriá son apelacion IGP Sud-Oèst”, çò apond la cooperativa bearnesa.