En seguissent la via de l’Assemblada Generala de l’ÒNU, que fa qualques meses admetiá Palestina coma estat observaire, es ara Google que reconeis l’estat palestinian. Malgrat que la societat del famós cercaire o aja pas anonciat, Palestine News Networkdescobriguèt dijòus passat qu’en la version palestiniana del cercador, Google.ps, i apareis ara lo mot “Palestina”, jol logotipe de Google, ont abans se podiá legir “Territòris Palestinians”.
 
En novembre passat l’ÒNU elevèt l’estatut de Palestina d’observaire a “estat observaire”, en reconeissent d’un biais indirècte un estat palestinian dins las Nacions Unidas. A partir d’aquela nòva condicion, Mahmud Abbas, president de l’Autoritat Nacionala Palestiniana (ANP), signèt un decret en genièr per remplaçar oficialament lo nom de l’ANP per lo d’Estat de Palestina.
 
Ara, Google s’es apondut a aquela reconeissença de Palestina amb un gèst petit mas fòrça significatiu.