Cada setmana, nos mena son fais de bestiesas tocant als catars, e tanben a l’istòria occitana.
 
Vaquí ara una associacion que se lança dins una Fèsta medievala pels 22 e 23 de junh a Durban de las Corbièras amb son fum d’animacions, de musicas e de taulejada sul tèma “Simon de Montfort revient occuper le village!“ (Simon de Montfòrt torna ocupar lo vilatge!)
 
S’èra lo cas, pensi pas qu’aquò balhèsse enveja d’anar faire balèti sus la plaça: seriá puslèu ora de s’embarrar pels ostals, de se refugiar dins la glèisa (encara qué!) o de prene las dralhas dels puèges vesins…
 
Es plan brave de se balhar tres còps d’espadas coma uèit cents ans fa, mas metre dins la meteissa saca lo borrèl e las victimas es un mesprètz segur de l’istòria e una escòrna faita a la memòria dels aujòls, aqueles que cresián a Paratge e Convivéncia…
 
Dins una letra dobèrta adreiçada als organizaires, l’IEO-Aude los convida a cambiar lèu-lèu la tematica de las fèstas: val mai que lo fuòc siague simbòl del solstici d’estiu que dels lenhièrs e per l’educacion del monde lor i fa seguir l’Epitafi de Montfòrt, tala que l’escriu l’Anonime dins la Cançon de la Crosada.
 
Bon, per se remetre d’aquò, cal plan anar se passejar per las Caritats a Besièrs, aqueste divendres 10 e dissabte 11, ont l’an passat se podiá trapar de kiwis sul mercat medieval e véser un supèrbe piòt a la bòria medievala tanben. Mas benlèu que Pepesuc descobriguèt las Americas abans lo Cristòl Colomb! Besièrs, que per son logò a cambavirat l’istòria amb son chivalièr blau e roge que celèbra l’esperit de conquista!
 
Que fa bon viure en país catar! Talament que los organismes labelizats d’aquela marca reprene, sens se pausar gaire de questions, l’anóncia de la fèsta de Durban. Qu’es complicat de saber çò que passa (o passa pas) pel cap del monde!




IEO Aude