La fin de las quòtas lachièras es programada per l’Union Europèa a la fin de 2015. Lo President del Conselh Regional d’Auvèrnhe, René Souchon, membre del Comitat de las Regions d’Euròpa e president de la comission de las ressorsas naturalas, planh aquela decision e fa pression per “atraire l’atencion sus las grèvas consequéncias de la supression de las quòtas de produccion dins las zònas de montanha”, çò ditz lo president, qu’apond qu’aquò “es l’execucion pura e simpla d’aqueles productors lachièrs”.

De fach, amb la fin de las quòtas lachièras, fòrça esplechas occitanas poiràn pas subreviure. Lo mercat del lach es aleatòri en foncion de las condicions climaticas e es tributari, pel sieu prètz, de las fluctuacions del gigant neozenaldés qu’expòrta 90% de sa produccion.
 
Dins aquel sens, Souchon a redigit un avís aprovat amb una larga majoritat per la comission NAT del Comitat de las Regions, lo 30 d’abril passat, e que serà lèu presentat en reünion plenièra. Aquel avís demanda sustot “una fòrta revalorizacion e una armonizacion de l’indemnitat de montanha, una ajuda europèa al subrecòst de collècta, e que la mençon complementària «lach de montanha», iniciativa de la profession plan recenta, siá assimilada als quatre signes de qualitat (AOP, IGP, SBT, Bio)”.
 
René Souchon participèt la setmana passada al Conselh Estatal de Montanha que se debanèt a Fois, e ont, segon el, se validèt “las orientacions de la mocion presa per la Comission Permanenta del Massís Central, amassada a Montbreson, que ditz sustot que cal far jogar las solidaritats”.
 
Las quòtas lachièras s’instaurèron en 1984, quand lo president auvernhat èra secretari d’Estat al costat de Michel Rocad, ministre de l’agricultura.