Arnaldo Otegi, en preson dempuèi octòbre de 2009, complís una condemnacion de 10 ans pr’amor qu’a participat a dobrir un nòu periòde de superacion de la violéncia al Bascoat. Mai passa lo temps, mai ven una figura determinanta pel pòble basco e un cap indiscutible de l’esquèrra independentista basca. Fins al ponch que la nòva formacion politica independentista, Sortu, a reservada per el la plaça vacanta de secretari general quand sortirà de preson.
 
Al començament de març, de centenats de bascos viatgèron amb d’autocars a la preson de Logronh per rendre omenatge a l’Otegi empresonat e per demandar sa desliurança. En aprofechant aquel acte, los grops de sosten a Otegi faguèron un documentari publicat la setmana passada. I parlan d’amics, de companhs e de dirigents de l’esquèrra independentista basca, e tanben de jornalistas e avocats, que comentan la figura d’Otegi e revendican sa libertat.
 
(Podètz activar los sostítols en catalan, espanhòl o anglés sus la barra inferiora del vidèo.)