L’universitari anglés Peter Ricketts es decedit ièr dimars. Aquel grand cercaire daissa una òbra scientifica majorala sus la lenga e la literatura occitanas de l’Edat Mejana. Foguèt cofondador e primièr president de l’Associacion Internacionala d’Estudis Occitans.

Lo Professor Peter T. Ricketts es defuntat dimars de matin, a cinc oras, en essent victima d’un arrèst del còr. Aquò arribèt mentre que trabalhava amb un de sos collègas. L’universitari anglés i mostrava, coma de costuma, tota l’energia e la tenacitat que lo caracterizavan.
 
Nascut en 1933, Peter Ricketts a consagrat una granda part de sa vida a la coneissença de l’occitan medieval e, en general, als estudis romanics.
 
En avent fach una carrièra brilhanta, èra vengut professor emerit de filologia romanica a l’Universitat de Londres Queen Mary and Westfield. Tanben èra professor onorari de francés a l’Universitat de Birmingham.
 
Foguèt lo primièr president de l’Associacion Internacionala d’Estudis Occitans (AIEO), de 1981 a 1990. Entre sas òbras plan nombrosas, òm pòt mençonar una edicion de LaVida de Sant Onorat, una edicion (amb Cyril P. Hershon) del Breviari d’Amor de Matfre Ermengaud, e mai una immensa banca de donadas de tèxtes occitans ancians, la Concordança de l’Occitan Medieval (CÒM).
 
Se pòt veire aicí una conferéncia que lo grand filològ anglés donèt sus lo Breviari d’Amor en 2011.
 
 
 
DS