Al Ayun vegèt dissabte passat la manifestacion mai granda per l’independéncia del Sahara Occidental. Segon qualques mèdias de Marròc, de centenats de personas manifestèron sens que las fòrças marroquinas intervenguèsson. Foguèron qualques 500 manifestants segon las fonts marroquinas, mas 2000 segon lo Conselh Nacional dels Dreches Umans.

S’agís de la manifestacion mai granda de l’istòria d’Al Ayun dempuèi la fin de la guèrra entre l’armada de Marròc e lo Front Polisario, en 1991. La protèsta se debanèt plan pacificament.
 
Los manifestants protestavan contra la darrièra resolucion de l’ÒNU, qu’un còp de mai empedís los observaires internacionals de raportar las violacions dels dreches umans. Marròc, amb l’ajuda de França, Russia e Espanha, capitèt d’anullar la proposicion dels Estats Units que demandava que la fòrça de patz de l’ÒNU al Sahara Occidental velhèsse pels dreches umans.
 
La manifestacion multitudinària metèt en alèrta las autoritats marroquinas e lor polícia, que se son mobilizadas al Sahara Occidental davant las protèstas dels darrièrs jorns. Segon divèrsas fonts, Marròc es nerviós e a mandat mai de policièrs e mai de militars al país.
 
Fòrça sectors considèran que lo pòble saharauí a perdut la paur.
 
Lo conflicte del Sahara Occidental visquèt un cambiament en octòbre de 2011 amb lo Campament de la Dignitat (Gdeim Izik). Alavetz, de milièrs de familhas saharauís s’installèron a qualques quilomètres d’Al Ayun per protestar contra la repression del govèrn marroquin e la manca de servicis socials. Lo campament foguèt desmantelat amb violéncia, amb lo resultat oficial d’onze mòrts.
 
Aquela protèsta signifiquèt lo començament de la lucha per l’autodeterminacion del pòble saharauí, per una nòva generacion.
 
La manifestacion de dissabte passat fa que lo remembre d’aquel tragic episòdi torne a la memòria de totes los còrses militars e politics de Rabat, que considèran qu’aquela mobilizacion s’es facha jos la direccion amagada del Front Polisario e d’elements estrangièrs, en se referissent a Argeria.