Los noms d’Agnetha Fältskog, Björn Ulvaeus, Benny Andersson e Anni-Frid Lyngstad vos dison probable plan pauc de causas. Mas l’acronim format per lors prenoms, benlèu mai: ABBA. Lo grop suedés dirigiguèt las listas de las cançons de mòda entre 1972 e 1982, ganhèt lo festenal de l’Eurovision en 1974 e a vendut fins ara 370 milions de disques. Quatre decennis après començar de sonar a Estocòlme, un musèu dedicat a aquel grop s’inaugurèt dimars passat dins aquela vila.
 
ABBA The Museum, luènh d’èsser una simpla veirina de remembres e d’objèctes del grop, es una vertadièra experiéncia interactiva per l’istòria d’ABBA e dels autres grands noms de la musica suedesa dempuèi los ans 1920.
 
E mai se lo grop se separèt fa aperaquí trenta ans, los quatre membres an enregistrat lors voses per las audioguidas qu’acompanhan los vesitaires a travèrs de las trenta cinc estapas del musèu, que se tròba dins una bastissa de dos mila mètres cairats. Dins un autre espaci, los vesitaires pòdon pojar sus l’empont, prene lo microfòn al costat de l’olograma dels quatre musicians e immortalizar lo moment amb un DVD.
 
L’idèa principala del musèu es de sarrar lo vesitaire a la vida e l’òbra de Björn Ulvaeus, Agneta Fältskog, Benny Andersson e Anni-Frid Lyngstad. Per aquò far an comptat amb l’engatjament dirècte del guitarrista, Björn Ulvaeus, qu’es vengut president del conselh d’administracion del musèu.