Un gojat de 17 ans foguèt tuat dijòus a 20h35 quand circulava en veitura per l’Avenguda Simon Bolívar, en lo 15n arredondiment de Marselha. Lo jove foguèt tocat per 23 projectils tirats amb una Kalashnikov e un pistolet.
 
Los tuaires aurián dobèrt lo fuòc après èsser arribats sus un escotèr. Lo menaire d’un autobús urban, que restèt blocat darrièr la victima, foguèt testimòni dels faches. I auriá quitament d’imatges vidèo preses dempuèi lo bus.
 
E mai se los pompièrs arribèron lèu, lo jove moriguèt sul pic.
 
Lo jove, nomenat Skander, èra vesin del quartièr, de la ciutat dels Falabreguiers, e la polícia lo coneissiá per de petits delictes restacats amb los estupefasents.
 
Mas segon La Provence, la victima auriá fach partida de la còla de malfachors que raubèt amb d’armas de ponh, lo 30 de març passat, la joielariá “Or” del centre comercial del Plan de Campanha. E mai s’Skander foguèt pas arrestat, lo jornal provençal d’expression francesa dedusís que l’assassinat pòt èsser un reglament de comptes restacat amb aquel delicte, car la polícia, après arrestar qualques raubaires, arribèt de trobar 80 quilos de resina de cannabis dins lo meteis quartièr dels malfachors.
 
Del sieu costat, lo prefècte de polícia, Jean-Paul Bonnetain, declarèt: “Veni de conversar amb lo ministre de l’Interior, qu’a deplorat l’edat jove de la victima. Çò que constatam uèi nos deu menar a agir contra los trafecs d’estupefasents amb encara mai de determinacion”.
 
Diluns s’amassaràn a Lion (Arpitània) lo ministre de l’Interior, Manuel Valls, la ministra de la Justícia, Christiane Taubira, e tot l’ensems dels prefèctes concernits per las ZSP, per n’establir un primièr bilanç.