Lo nomenat Collectiu del 31 de Març de 2012, qu’amassa un vintenat d’organizacions de tot l’Estat francés, trabalhant per defendre e promòure las culturas e lengas mal nomenadas regionalas, portarà dimècres que ven, lo 15 de mai, a la sedença de l’UNÈSCO a París, una reclamacion per que la Republica Francesa faga un còp de barra tocant aquelas culturas que fan partida del sieu patrimòni. Dins aquel sens, se reclamarà la reconeissença de las lengas “regionalas” dins la constitucion francesa, la ratificacion de la Carta Europèa de las Lengas Regionalas e Minoritàrias de la part de França, e mai l’establiment d’una lei per protegir e promòure las lengas e las culturas “regionalas”, per exemple dins l’educacion.
 
Lo Collectiu farà una accion revendicativa e mediatica en tot demandar l’asil politic de las lengas e culturas minorizadas a l’UNÈSCO. Cada lenga minorizada serà representada per un membre de la societat civila e un representant politic elegit, per donar de transversalitat a la demanda simbolica. L’intencion politica dels promotors d’aquela accion es de metre França en evidéncia davant lo principal organisme cultural del Mond, en prenent en compte sustot que la Republica a signat totes los tractats que, supausadament, l’obligan de susvelhar lo sieu patrimòni cultural; en mai d’aquò l’Estat francés se vanta davant lo Mond d’èsser lo fondador e grand susvelhant dels dreches umans.
 
Lo Collectiu del 31 de Març amassa fòrça organizacions e associacions de tot l’Exagòn, amb una fòrta preséncia occitana. Dins aquel sens, compren l’Institut d’Estudis Occitans (IEO), lo Felibritge, la Federacion dels Ensenhaires de Lenga e Cultura d’Òc (FÈLCO), entre plan d’autres.