Lo Partit Conservator britanic, dirigit pel primièr ministre David Cameron, presentèt dimars passat un avantprojècte de lei per menar a tèrme a la fin de 2017 un referendum sus la continuitat del Reialme Unit dins l’Union Europèa, segon un pòrtavotz. Cameron ensajariá aital de conténer la pression dels parlamentaris antieuropeïstas que li exigisson que faga la consulta sus lo fach de restar dins l’UE, abans las eleccions que venon previstas per 2015, o ben qu’apròve una nòva lei per que s’engatge de menar lo referendum a tèrme en 2017.
 
“Lo Partit Conservator farà public uèi un esbòs de lei per legiferar sus la celebracion d’un referendum a la fin de 2017”, çò diguèt dimars passat un pòrtavotz del primièr ministre e cap dels Tories. “Estudiarem totas las escasenças per portar la lei dins lo parlament”, çò apondèt.
 
La presentacion d’un avantprojècte de lei per fixar la data del referendum se saupèt paucas oras après que, dimenge, dos ministres influents, lo de l’Educacion e lo de la Defensa, assegurèsson que votarián per la sortida del Reialme Unit de l’Union Europèa.