Lo govèrn valencian del Partit Popular a comparat los Païses Catalans amb l’Alemanha nazi, en profechar de sa majoritat per aprovar una resolucion qu’enebís d’emplegar lo tèrme “País Valencian” per nomenar lo País Valencian: se deu nomenar solament “Comunautat Valenciana”. La lenga catalana parlada dins aquel país (o comunautat) se deu nomenar “valencian” segon lo partit espanholista.

Dempuèi dimècres passat, es enebit d’emplegar lo nom “País Valencian” dins l’administracion del País Valencian. O decidiguèt lo Partit Popular (PP), qu’empleguèt sa majoritat dins las Corts Valencianas. La “proposicion non de lei” (resolucion qu’es pas una lei), tala coma l’an aprovada, demanda a las institucions de non tractar cap d’iniciativa parlamentària ni cap de tèxt que “non respècten pas la denominacion oficiala de Comunautat Valenciana o que la remplacen per una autra”, coma País Valencian. La proposicion foguèt aprovada amb los 47 vòtes del PP, malgrat los 37 contraris de la rèsta del parlament valencian.
 
Lo PP ditz que s’agís d’una responsa a una declaracion institucionala de la comuna de Barcelona de junh de 2012, que parlava dels Païses Catalans e del País Valencian.
 
Lo PP exigís de nomenar lo país “Comunautat Valenciana”, “tal coma se representa dins l’estatut d’autonomia”. Mas de fach, dins l’estatut se parla almens dos còps de “País Valencian”, nom emplegat abitualament per la societat e per totes los autres partits politics.
 
 
An comparat los Païses Catalans amb l’Alemanha nazi
 
Lo deputat del PP Rafael Maluenda, que foguèt l’encargat de defendre la proposicion dins las corts, comparèt la defensa dels Païses Catalans amb l’Alemanha d’Hitler: “Pr’amor qu’en Àustria parlavan alemand, tot èra un”, çò diguèt Maluenda als autres partits, en tot afirmar que de se referir al País Valencian coma part dels Païses Catalans, aquò èra “una traïson de l’istòria del nòstre pòble”.
 
Pendent la defensa de la proposicion del PP, Maluenda afirmèt que “País Valencian” es pas jamai estat una denominacion oficiala e insistiguèt sus l’emplec del tèrme “Comunautat Valenciana” per far referéncia al territòri. Al delà, segon lo PP, cal emplegar “valencian” per nomenar la lenga catalana parlada al País Valencian.
 
Dins los mèdias espanhòls, lo País Valencian es sovent nomenat “Levant” (Levante), nom que poiriá sonar estranh dins las Illas Balearas. Ça que la, lo PP a pas res dich contra aquela denominacion. An pas tanpauc demandat de donar lo nom de “valencian” a l’espanhòl parlat amb l’accent de Valéncia.