Aprèp un momenton de discrecion, aquesta rubrica se’n tòrna, non pas amb un libre, senon qu’amb una mapa. Las cartas e los atlasses pòdon èsser a l’encòp òbras literàrias de nauta tenguda e òbras artisticas d’una granda finesa. Se i ajustam l’aspècte scientific e sovent politic se pòt dire d’una mapa qu’es una de las realizacions mai complèta de l’esperit uman. Una mapa a l’encòp se gaita, se legís e se saboreja.

D’unas cartas an marcat l’istòria umana: la Carta Marina d’Euròpa del Nòrd d’Olaus Magnus, la Mapa de Waldseemüller que, pel primièr còp, menciona lo nom “America”, las cartas de vim (“stick charts”) dels pòbles polinesians, la Carta de Cassini, o mai prèp de nosautres la Carta Michelin o la Carta d’Estat Major per l’estat francés. Cada granda carta marca de son influéncia una epòca, un territòri e los òmes.

Fa qualques meses la societat Macarèl, tra que coneguda nacionalament per la venda de produits ligats a l’imatge del País Nòstre s’es lançada dins l’edicion d’una Mapa d’Occitània. L’òbra es magnifica: fa una representacion d’Occitània tota, amb lo relèu, los flums, las vias de comunicacion, los lòcs culturals màgers, las vilas, los noms e las bandièras dels païses. Las colors son esbleugissentas. La papièr, solide e espés es pro lusent per far sortir los contrastes sens que se rebate lo lum. La dimension es de 100 cm x 70 cm.
 
Danís Cantornet, lo capolièr de Macarèl explica las rasons que se lo faguèron engatjar dins la realizacion d’aqueste trabalh: “Nautres a Macarèl sèm nascuts de la bandièra. Per conéisser un país, cal una bandièra, un imne e una mapa”. La realizacion ne prenguèt mièg annada. An demandat l’ajuda de l’I.E.O., de l’Ostau Bearnés, de l’Espaci Occitan, e de mantun especialista de totes los caires d’Occitània. Los noms son en grafia alibertina, amb qualques paucas excepcions (coma Nissa amb doas S a la demanda dels Niçards). Danís Cantornet çò ditz: “Fasèm çò qu’es lo mai util e lo monde cal que se trapen dins aquesta mapa. Cal que digan: Ieu soi d’aquí.”.

Existís tanben dins un format gegant de 200 cm x 125 cm en tela de tenda. Danís explica que sovent, quand mòstra la carta pels mercats, lo monde son suspreses de veire a quin punt Occitània es un país estendut. D’aqueste punt de vista es una aisina pedagogica. Danís, plan justament, es fièr de son òbra e de de la siá valor militanta. Ditz que sonque per las fièras “I a mai d’un milion de personas per an que nos veson, doncas se podèm far un bocin de reclama pel país serà pas marrit.”.

Aquesta mapa d’Occitània es un objècte indispensable per qui vòl conéisser la geografia e la toponomia nòstra. Es un objècte indispensable de per las siás qualitats artisticas e scientificas. Es un objècte indispensable per cada occitan ja que lo Nòstre País, plan dessenhat, plan jalonat, enfin trapa tota la siá dignitat cartografica.
 
 
 
 
Terric Lausa
 
 

_____
Mapa d’Occitània (ed. Macarèl - 2012)
– Version papièr 100 cm x 70 cm - 12 €
– Version en tela de tenda 200 cm x 120 cm disponibla
 

Entrevista de Danís Cantornet .avi from Terric Lausa on Vimeo.