E mai se se joguèt en Irlanda, la granda finala de la Copa d’Euròpa de rugbi es estada occitana... amb una partidassa entre Clarmont d’Auvèrnhe e Tolon. Dins lo primièr temps se faguèt pauc de ponches mas l’engatjament de las doas esquipas foguèt fòrça grand. Dins lo segond temps los provençals foguèron un pauc mai practics que los auvernhats. Foguèt una finala cauda e plena d’emocion ont Tolon ganhèt la Copa d’Euròpa per un ajustat e emotiu 15-16.
 
Malgrat que se joguèsse a l’Aviva Stadium, la victòria foguèt saludada a Tolon. De concèrts de claxon emplissián la vila provençala del temps que las aperaquí 8000 personas que seguissián l’encontre sus doas pantalhas gigantas, dins l’Estadi Mayol, ocupèron la pelena amb una explosion de jòia, e mai se ploviá tant coma podiá.
 
Las bilhetas per seguir la partida dins l’Estadi Mayol se vendèron a 2 èuros e tot l’argent amassat se destinarà a l’associacion Sòl En Si (Solidaritat-Enfants-Sida).
 
L’esquipa tolonenca pòt pas encara tornar per festejar sa primièra copa d’Euròpa, li cal passar abans per Nantas (Bretanha) per jogar la semifinala del Tòp 14 contra Tolosa. Los suportaires de l’esquipa provençala, e tanben los de l’esquipa lengadociana, auràn de se desplaçar fins en Bretanha per seguir la partida.
 
Los nòus campions d’Euròpa tornaràn dissabte 25 de mai per entonar lo Pilo Pilo amb los tolonencs e festejar aquela granda victòria.