Parlan d’enlevament de jòunas filhas, daus còps atjadas de 12 ans, per los rebels dau MNLA que las aurián sequestradas per las forçar. Parlan tanben de pilhatges per los òmes dau MLNA o de las milícias arabas dins los ospitaus, los bastiments governamentaus, las bancas, los ostaus de personalitats localas, las escòlas e las egleisas. Los d’Ansar Dine aurián destrusir daus bars e ostalariàs, associats per ilhs a la consomacion d’alcool e la prostitucion. Los pilhatges serián tanben lo fach de la populacion locala e daus prisoniers liberats dau tandis que los rebels avançavan. 

 

Los sodards malians, quand eran enquera sus plaça, aurián tanben comés de las exaccions segon daus tesmonhs. Aurián executats daus òmes, civils coma militars, a la “peu clara” :  toaregs, arabs o mauritanians. Los abitants de mai d’una vila e vilatge indican maitot la preséncia de dròlles de 14 a 17 ans, daus còps de 13 ans nonmàs, demiest los combatants. Daus militars malians avián desjà sinhalats que daus dròlles fasián partida dau MNLA dempuei la debuta de la revòlta en genier passat. 

 

Ansar Dine sembla participar mens a quilhs crimes e metrián quitament en plaça de las mesuras per protegir los civils (patrolhas, linha telefonica d’urgéncia). Aplican totparier la sharia d’un biais violent : flagelacions, mutilacions o execucions per los que segon pas son interpretacion estricta de la lei islamica. Per Corinne Dufka, cerchaira senior sus l’Africa a Human Rights Watch “los comandants de quilhs grops devon cessar las exaccions, disciplinar lors combatents, e sancionar d’un biais apropriats las personas de lor reng responsablas de quilhs crimes.”


Maime Caillon