L’amassada de neonazis, que mobilizèt la vigilància de l’estat pendent la dimenjada de Pentacosta, se debanèt fin finala a Caussinuòjols (Espinosa) en petit comitat. Segon d’informacions de L’Indépendant, los de la prefectura del departament dels Pirenèus Orientals trobèron pas cap de signe de la preséncia dels neofaissistas e mai se foguèron “fòrça vigilants” en tot moment. “La reünion, de mens d’un centenat de quadres d’aqueles movements, se debanèt la nuèch de dissabte a dimenge dins la sala de las fèstas d’una pichona comuna près de Montpelhièr, reservada jos un fals pretèxt”, çò indiquèt diluns passat la sosprefècta de permanéncia del departament occitanocatalan, Alice Coste.

L’eveniment es estat fòrça discret en comparason amb l’amassada d’aperaquí 1000 o 2000 neonazis que se debanèt en Lorena en novembre de 2012.

La setmana passada, Fawfach, un blòg especializat en la vigilància dels movements neonazis, faguèt publicas las donadas de l’eveniment organizat pels Hammerskins franceses, sucursala del movement estatsunidenc pròche lo Ku Klux Klan. Segon lo blòg antifaissista, l’eveniment se debanariá al nòrd de Catalonha, en Fenolhedés o en las Corbièras e los neonazis avián anonciat de concèrts de grops de RAC (rock anticomunista) e de navetas dempuèi l’aeropòrt de Perpinhan.

La publicacion de l’eveniment, que pòt aver frustrat los plans dels Hammerskins, provoquèt l’alèrta entre las fòrças de seguretat e doas manifestacions antifaissistas a Perpinhan, ont participèron un centenat de personas a caduna.