Lo tornèu si debanerà per lu pichoi de 3 ans fins a 15 ans e serà animat per Jonatan Santilli que v’emparerà de fabricar un pilo emb de rodèlas e de plastic, de jugar a 1 còntra 1 ò 2 còntra 2. Serà finda l’arbitre d’aquest tornèu.
 
Si pòu joglar embau pilo, lo mandar “embai pèns, emb la tèsta, lu ginolhs mas pas lo rèsta”, coma ben ditz la cançon La Samba dau Pilo de Joan-Pèire Baquié.
 
Lo reglament de la Federacion Nacionala de Pilo (FNP) serà pròpi ben seguit, per fin d’alestir li gents a la venguda de l’eveniment tant asperat: lo 25n Campionat dau Monde de Pilo, coma cada an a Coarasa, lo 6 de julhet, organizat per l’associacion Avanti!
 
Lo tornèu de deman serà organizat per lo Centre Culturau Occitan-País Niçard e Alpenc en partenariat emb Bien Vivre Notre Quartier e lo Pôle de Proximité Ouest Littoral de la vila de Niça. Lo tornèu serà registrat per la ràdio Niça Pantais.
 
Mai d’informacions au +33 (0)6 71 18 61 21 ò a info@nissa.org.
 
 
Lo pilo
 
Lo pilo es un juec de joglaria e si fa coma s’aguessiam un balon que deguèsse sempre estaire en l’èr. Es un juec de carriera ben popular.

Lo principi de basa es de far volar una pèça traucada ò una rodèla metallica. Dins lo trauc se mete un volant fach de papier (la màger part dau temps) per fin de donar d’estabilitat au pilo. Si pòu jugar fàcia a fàcia de cada part d’una rega traçada au sòl ò en esquipa de doi personas sus un terren en forma de crotz.

Juec conoissut dins d’autres país dau monde, es un simbòl de l’originalitat culturala occitana dins la region. Un libre li foguèt dedicat e Nux Vomica faguèt e mai una cançon en onor dau pilo.

Lu terrens oficiaus e ocasionaus son recensats sus lo sit dau pilo.




 
Laurenç Revèst