Una delegacion de Libertat!, lo movement occitan d’esquèrra revolucionària, vesitèt Saragossa (Aragon), convidada pel collectiu aragonés A Enrestida, en una jornada de debat suls centres socials. I presentèron ailà la Tor deu Borrèu dempuèi lo ponch de vista istoric, la gestion actuala e las siás relacions amb los vesins. I presentèron tanben d’autres projèctes de centres socials bearneses coma Alandar, lo Nid Bearnés o la Larada.
 
La Tor deu Borrèu es lo local politic de Libertat! en Bearn. S’agís d’un centre social consagrat a la cultura e a la lucha politica e sociala occitanas. Prepausa un estanquet, de musica, de seradas, de concèrts e fòrça activitats socialas.
 
Aragon es un país vesin que tòca dirèctament Occitània per los Pirenèus. Patís una situacion lingüistica, politica e sociala fòrça semblabla a l’occitana. La lenga aragonesa es considerada un patés pels sieus parlants naturals. L’estat espanhòl la reconeis pas e lo govèrn autonòm a fach recentament una lei per privar de tot drech lingüistic los parlants de l’aragonés e del catalan d’aquel país.
 
Al nivèl social, Libertat! i mòstra lo sieu sosten amb la lucha contra lo projècte d’una restanca giganta que deu inondar lo vilatge d’Artieda. Lo collectiu occitan participa activament cada an al festenal revendicatiu d’aquel vilatge.
 
 
Al Bascoat
 
D’un autre costat, aquel meteis dissabte, una autra delegacion de Libertat! participèt a un acte de solidaritat internacionalista a Elizondo (Bascoat).
 
Es de notar qu’Elizondo es dins la Val de Baztan, un parçan ont qualques municipalitats se son declaradas “zòna liura de sionisme”.