Coma un pauc d’en pertot en Occitània, a la maniera de las maiadas gasconas, lo mes de mai es un mes de fèsta. Es l’ocasion d’entretenir lo ligam social. E cada an, totes los diménegues dal mes de mai, los espacis publics verds acuelhon de Festins dals Mais. Aquest an, l’animacion dals Festins dals Mais de la comuna de Niça, en occitan niçard, serà asseguraa per Cristòu Daurore, Director dal Centre Cultural Occitan-País Niçard e Alpenc (CCÒc-PNA).

E mai, i a una novetat importanta per l’occitan dins aquela fèsta de la renaissença: s’es lançat lo partenariat radiofonic interregional occitan de la ràdio hertziana Ràdio Lenga d’Òc Montpelhièr amb la ràdio Internet Niça Pantais. Dins lo sieu projècte d’espandiment ràdio, Ràdio Lenga d’Òc se passea un pauc d’en pertot dins lo canton tot de lòng d’aquesto mes per realizar reportatges e emissions en dirècte e en diferit. Se realizèt ja un “Aperitiu Ràdio” de Sam e Galaad amb Cristòl, Jonatan e Ciril, en dirècte dal local Lo Trident de l’associacion Niçard per Totjorn, en escota sus Internet.
 
Dins la seguida dals rendètz-vos, i a un enregistrament de concèrt al Collectiu dals Diaus Blaus —a costat la Facultat de Letras Sant Joan d’Angèli—, fach per Enric Maquet, e una visita guidaa en occitan. Parierament: un reportatge per la fèsta de Santa Capelina. Per acabar: ambal famós Festin dals Mais de Cimier, per “ virar los mais”. Serà l’ocasion de sentir la vitalitat de las associacions culturalas que viran entorn de la lenga nòstra dins lo departament e que son al contacte dal public cada diménegue d’aquel mes. Enfin, serà l’ocasion de parlar d’un novèl site que recensa totes los festins (las fèstas patronalas), a Niça coma en la Gavotina de la Comtat.
 
Aquesto trabalh d’escambi e de programas radiofonics prefigura l’arribaa de Ràdio Lenga d’Òc Niça sus la ràdio numerica terrèstra (RNT). L’RNT va remplaçar a tèrme la ràdio hertziana, coma la television numerica terrèstra (TNT) remplacèt la tradicionala television analogica terrèstra qualques meses fa. La futura zòna d’emission es un espaci panoccitan que compren los tres espacis dialectals de la region: lo vivaroalpin, lo niçard e lo provençal. Serà escotabla sus un airal que cauprà la Gavotina d’A Torbia, Esa (la marina), las valaas dals Palhons (de Pelha fins a L’Escarea e Coarasa), la mejana valaa de Var (fins a Carròs e a las Pòrtas de Levenç), la Provença Orientala (de Vença fins a Ròcafòrt, Mogins e Teula en passar per Sofia Antipòlis) e lo País Niçard (l’airal urban fins a Bèuluec e Canha e las còlas de Niça). L’RNT en occitan dins los Alps Maritims farà sa rentraa amb las autras ràdios numericas dal departament per lo principi de l’an de 2014.
 
Cal notar qu’aquel projècte a lo sosten de ràdios web d’autres departaments de la region Provença-Alps-Còsta d’Azur: Ràdio Lo Rigau dins Var e Ràdio Copa Santa en Vauclusa, amb cu an l’intencion d’intensificar los escambis.
 
 
 
 
Laurenç Revèst