Un soldat d’aperaquí vint e cinc ans foguèt escotelat al còl amb una lama de rasor dins lo quartièr de La Défense de París, segon Le Parisien. Las primièras informacions de la polícia, totjorn segon aquel jornal e tanben segon Le Monde e Libération, parlan d’un agressor d’aperaquí 25 o 30 ans, d’1,90 m de nautada, barbut e abilhat a la faiçon tradicionala aràbia. Lo soldat, qu’èra de servici e vestissiá son unifòrme, es fòra perilh après èsser estat sonhat dins un local del servici dels transpòrts metropolitans de París.
 
Just après l’atac, que se produsiguèt près de la gara dels trens, davant la botiga Virgin, l’agressor fugiguèt e l’an pas encara trobat ni detengut. La seguretat francesa a obtengut d’imatges del presumit agressor amb las camèras de seguretat de la zòna.
 
Aquel atac arriba solament tres jorns après l’assassinat d’un soldat britanic a Londres qu’a esmogut lo Reialme Unit.
 
 
Hollande: “Cal prene en compte totas las ipotèsis”
 
Lo president francés, François Hollande, a dich dempuèi Etiopia que “cal prene en compte totas las ipotèsis”, e mai s’a dich qu’a priori i aviá pas cap de ligam amb l’assassinat de Londres. “Cresi pas qu’en aqueste moment poscam far cap d’especulacion. Demandam a totes los nòstres soldats e tanben a las fòrças de seguretat en mission antiterrorista qu’aumenten lor estat de vigilància”, çò apondèt.