An arrestat una femna de 28 ans qu’al començament de la setmana passada feriguèt una jove collegiana amb una replica d’arma medievala a Vitròla (País Marselhés). La victima se trobava dins una lista de 25 personas que l’agressora projectava d’assassinar, segon çò que raportèron divendres passat de fonts policièras.

Una jove escolana de 12 ans foguèt atacada al cap amb una bòla eiriçada de 12 clavèls, diluns passat, a 8 oras del matin, quand anava al collègi a Vitròla (País Marselhés).
 
Après l’atac e las explicacions de la victima, la polícia relièt l’afar amb la desaparicion d’una femna que sofrissiá de desòrdres psiquiatrics. Lo paire d’aquela femna, que demòra a Ginhac la Nerta, aviá avisat lo comissariat de Marinhana que sa filha, perturbada, partiguèt amb una replica de l’arma medievala e un ponhal napoleonian de sa colleccion privada. Al delà, lo paire ajustèt qu’aviá trobat una lista de 25 noms establits per sa filha amb l’intencion de tuar aquelas personas.
 
Alavetz comencèron las recèrcas del temps qu’avertiguèron las victimas potencialas.
 
La suspècta passèt pels Alps ont retirèt d’argent a la banca e se desfaguèt de l’arma, qu’es pas encara estada trobada. Foguèt arrestada dimècres quand tornèt a son ostal de Ginhac la Nerta.
 
Mesa en garda a vista, la femna diguèt als policièrs que poguèt pas tuar l’adolescenta perque l’arma se trenquèt. Se mostrèt “fòrça determinada”, que voliá tuar aquelas 25 personas, segon una font prèpa de l’enquèsta, pr’amor que “totas las pensadas d’aquelas 25 personas li arribavan dins lo cap e que la sola solucion èra de las tuar”.
 
Las 25 victimas potencials an un ponch en comun: totas son restacadas a un centre de triada postala on la suspècta trabalhèt coma manutencionària abans d’èsser licenciada fa un an.
 
Segon lo paire de la suspècta, los destorbes de la femna s’èran agreujats d’après aquel licenciament.
 
La gojata atacada èra filha d’un parelh que trabalhavan dins lo centre de triada.
 
La suspècta, examinada per un expèrt psiquatric, es estada considerada coma “fòrça perilhosa” e la caldrà espitalizar. Una informacion judiciària s’es dobèrta.