La Cambra de Comèrci e Indústria (CCI) de Nimes a desvelat las primièras linhas d’un megaprojècte nomenat Frenchvallée, que lo vòlon far près de Nimes. S’agís d’un complèxe faraonic del tipe de Las Vegas, mas en metent en scèna lo “produch de França dins tota sa diversitat”. La tòca es d’atraire 30 milions de toristas.

L’idèa es d’un megacomplèxe de 700 ectars qu’aurà 30 ostalariás amb casinò, de botigas de grandas marcas francesas, de teatres e de luòcs de venda de produches locals. “Volèm promòure lo made in France en incorporant de reproduccions dels nòstres monuments mai emblematics coma la Tor Eiffel, lo Mont Saint-Michel, lo paquebòt France, los castèls, las Arenas de Nimes…, e de cultura, de mòda, de gastronomia…”, çò an soslinhat los de la CCI.
 
Eurodisney recep 15 milions de vesitas per an e Las Vegas ne recep 39. “Sovent los toristas estrangièrs van a París o a la Còsta d’Azur. Pel nòstre país solament i passan, o demòstran las 27 milions de veituras que transitan per las nòstras estradas cada sason”, çò disiá Jean-Louis Calini, agent immobilièr e promotor de Frenchvallée.
 
“Avèm de grands avantatges: de bonas estradas, 300 jorns de solelh, las Cevenas coma patrimòni de l’Umanitat, la Mar Mediterranèa…”, çò apondèt Calini.
 
Lo promotor soslinha lo còst zèro del projècte: “Costarà pas res! Se trabalharà amb lo sistèma de las concessions”. Aquò vòl dire que los investidors e los operators dels casinòs ofriràn d’argent per que los mèstres d’òbra menen a tèrme los trabalhs d’infrastructura. An estimat que lo projècte costarà 16 miliards d’èuros e son a cercar d’investidors.
 
Lo taus de caumatge del departament de Gard (Costièra de Nimes, Garrigas e Sud-Èst de Cevenas) es fòrça naut “e amb Frenchvallée se redusiriá considerablement. E mai s’encara es pas definit l’emplaçament exacte, sèm a negociar”.
 
A l’ora d’ara, la CCI de Nimes a engatjat de negociacions amb los mai grands casinotièrs de tot lo Mond, amb los ministèris de l’Interior, de l’Indústria, de las Finanças e de la Cultura. Per bastir la Frenchvallée, serà indispensable de reveire una partida de la legislacion de l’estat francés.