Per la Dimenjada magica, los Dracs tornavan trapar lor menaire de jòc Scòtt Dureau qu’aviá recebut en debuta de setmana lo fuòc verd medical per poder jogar. De mai, per afrontar dins l’estadi del Manchester City, los London Broncos, l’infirmariá dels Dracs s’èra voidada; a tal punt, que Laurenç Frassinós decidèt d’acordar una pausa al Tomàs Bòsc. Scòtt Dureau signèt son retorn en marcant lo primièr ensag catalan de la partida e ajustèt 14 punts al pè (6 transformacions e una penalitat) per assegurar una brava victòria als Sang e Aur: 46-18. Punt negre al tablèu: la nafradura al tendon d’Aquiles de Loís Anderson: sason mai que probablament acabada. Dimenge, los Dracs aniràn afrontar los Vikings de Widnes amb las favors dels pronostics.
 
En Super-Liga, los arbitres tanben son sancionats: atal, per Estève Ganson, novèl responsable del còs arbitral, mas qu’acordèt dissabte a la vidèo l’ensag de la victòria a HullFC fàcia als vesins de HullKR malgrat un fòra-jòc que foguèt lo sol a pas véser. Dimenge, deguèt presentar excusas a HullKR e un autre arbitre prenguèt sa plaça darrèr l’ecran.
 
Dins Aude, los lendemans de victòrias nacionalas son de mal engolir e, sus la pelena de Vilanòva de Menerbés, pel trofèus departamentals, l’equipa locala bat lo Val de Danha: 44-14 alara que Sant-Laurenç rempòrta enfins la tresena de sas confrontacions en seguida contra lo campion Lauquet-Preissan: 25-21 al punt en aur!
 
A La Reula, l’equipa dels juniòrs de mens de 18 ans manca l’entama de la partida e pèrd 52-28 fàca als joves de l’England Academy.
 
Los agaches tretzistas se viran cap a Merinhac ont se ten aquesta dimenjada lo Congrès de la Federacion que ne deuriá sortir lo format de la competicion d’Elèit per l’an que ven. Per l’ora, se parla d’una competicion amb 10 equipas: Albi remplaçariá Lescura e Palau montariá.
 
La sason se dobririá per una Dimenjada Magica los 21 e 22 de setembre. Mas son d’informacions e de suposicions que vos confirmarem lo còp que ven.
 
 
 
 
Alan Roch